Fr. Perseus: Amahan ug Magtutudlo

Kung ang pari palanggaon ang batan-on, tagdon usab siya sa ingon hangtud sa kamatayon. Niay kwento ni Ms. Mary Ann Estancia, ang youth coordinator sa San Isidro Labrador, Hagonoy, Davao del Sur.

* * * * * *

Dear KNOT,

“Padayon lang sa pagbuhat sa kung unsay maayo”.

Kini ang permi niyang gina-ingun kanako sa panahon nga naa’y mga gagmayng problema sa youth apostolate. Fr. Perseus is truly a good father to us. Sa amoang mga youth dinhi sa Hagonoy, mura na g’yud namu siyang tinuod nga amahan.

Supportive gayud kaayo siya sa mga batan-on ug sa amung mga kalihukan. Pag naa mi pangayuon (in cash or in kind) mohatag gayud dayon na siya, sobra pa gani usahay. Permi niyang ginapanghimangnuan ang mga hamtong nga dili kasab-an ang mga batan-on, dapat palanggaon gayud.

Si Padre maayo kaayo mohatag ug tambag maskin pag kalabot sa personal. Gina-share naku sa iyaha tungod kay ang iyang mga tambag makatabang gayud ilabi na sa espirituhanong pagkinabuhi.

Fr. Perseus is very artistic, sporty, and talented sa pagkanta ug pagkuskus sa gitara. Sa oras sa iyang kamatayon sakit jud kaayo ug dili ko makatoo kay nag uban pa mi pagkabuntag kay naghatag pa siya ug Spiritual Enrichment namu nga mga empleyado sa LGU Hagonoy sa Regular Monday Convocation Program.

Wala ko nakasabot sa akung gibati nga kasakit sa maong pagkamatay ni Padre nga mura na pod naku ug amahan. Ang iyang pagtrato ug pagpangga naku mura na pod ko niya ug anak. Ang akung mga kasinatian sa dihang buhi pa siya puros gayud maayo ug wala gayu’y samang kaayo. Pinalangga gyud mi niyang mga kabatan-onan.

Sa iyang pagpanaw magpabilin siyang buhi sa amung kasingkasing ug hunahuna, ilabi na ang iyang mga maayong tambag nga maoy makapalig-on sa amung pagpangalagad ug sa amung espirituhanong pagkinabuhi.

* * * * * *

Si Fr. Perseus Gonzales, PhD mao ang mipuli kang Fr. William Malley isip Executive Director ug professor sa Ignatian Institute of Religious Education, Inc. (IIREF). Nagtudlo siya sa seminaryo sulod sa 14 ka tuig. Siya sab ang spiritual youth director sa Davao del Sur. Ang iyang talento sa musika nagsukad sa iyang amahan nga manugtugay sa rondalla sa Bansalan. Ang iyang inahan relihiyosa. Ang pamilya nagaampo sa rosaryo matag alas 4 sa buntag. Aktibo usab sa simbahan ang iyang igsoon nga si Emerito isip lay minister. Salamat kang Rhoda Allado sa dugang impormasyon.

Mary Ann sa imong pagpaambit, hinaut nga ang inspirasyon nga gibilin ni Fr. Perseus magpadayon karon ug sa sunod pang henerasyon diha sa tibuok dayosis sa Digos. ‘til next kwentuhan, higala! – Cheng