Altar servers gihagit: Dili lang score sa DOTA ang iampo

Si Chubbs William Wenceslao gikan Sto. Niño Parish, Kaputian, sa iyang kabatan-on usa sa miapil sa Altar Servers Convention niadtong Pebrero didto sa St. Francis Xavier College Seminary. Matud niya, “kami ang mga tigtabang sa pari diha sa santos nga misa. Tambag niya sa isig ka altar server nga “hinaut pagsimba dili lang pagtaas sa Match Making Rating (sa DOTA) ang iampo, apan ang obligasyon isip altar servers nga mao ang pagpadaghan nato diha sa tagsa tagsa ka katilingban.”

Subay sa tema, “Altar Servers: Timaan sa Lig-on nga Tawag sa Diyos sa pag alagad diha sa parokya”, ang maong panagtapok gisugdan sa misa nga gipangulohan ni Fr. Orly Angelia kauban sila Fr. Dioscoro Saniel, Spirituality Director, Fr. Jesus Samaniego, kura paroko sa St. Mary of the Perpetual Rosary sa Buhangin, ug Fr. Elvie Bordios, Vocation Director. Human sa misa misunod dayon ang inputs ug mga padula.

Matud kang Sem. Carlo Selorio, Chairperson sa Organizing Committee, “ang altar servers mao ang instrumento sa pagpakaylap ug pagpalig-on sa kahiusahan sa katilingban.” Sa pag ampo kanunay, matud pa mamahimo kanilang madasigon sa pag-alagad diha ni Kristo. Gipakita sab nila ang ilang tagsa-tagsa ka mga talent.

Gikan sa pito ka bikaryato, mao kini ang ihap sa miapil: Sto. Rosario Vicariate, 338, San Pedro Vicariate, 224,Sacred Heart Vicariate, 221,St. James Vicariate, 197,San Pablo Vicariate 178, Sta. Ana Vicariate 152,ug ang Immaculate Conception Vicariate, 110. Adunay 76 ka partisipante usab gikan sa congregations ug eskwelahan.

Nanguli nga malipayon ang mga altar servers uban ang paninguha nga daghan pang batan-on ang mamahimong altar servers aron padayon nga mabibo ang kinabuhi sa simbahan. (Jane Alarcon | SILP SoCCom)