Recollection, communion nakapaluha sa ginikanan

Wala nakapugong ang kagubot sa palibot sa saysentay nuebe (69) ka mga bata sa Grade III sa Malabog Central Elementary School aron mutambong sa ilang kinaunhang recollection ug komunyon niadtong Pebrero 24 sa San Roque Parish, Malabog kauban ang Kura Paroko, Fr. Jemasol Ortiz.

Midagayday ang luha sa usa ka ginikanan sa kalipay nga iyang nabati. Si Mrs. Divina Mirafuentes nga taga sentro Malabog miingon, “isip usa sa mga ginikanan sa mga bata nga midawat sa lawas ug dugo ni Kristo, siya uban sa iyang bana nakakita gyud sa kalihukan. “ Si Sophia nga iyang anak midawat na gayud sa lawas og dugo ni Kristo niadtong higayuna. Nakahilak siya sa suwat kaniya ni Sophia diin kini nangayo ug pasaylo sa tanan niyang mga sala. Kini higayon nga nagkahiuliay sila isip anak ug ginikanan.

Matud ni Jeanifer Arañez, ang catechist parish coordinator sa SRP, “nalipay ko kay epektibo ang maong pamaagi Gamiton gayud unta sa mga bata ang ilang natun-an, magpuyo nga buotan ug tumanon ang ilang saad nga muapil na sa pagsimba matag Domingo uban sa ilang mga ginikanan. “Sa mga ginikanan, unta sa kanunay anaa ang inyong pagmahal ug pagsuporta ngadto sa inyong mga anak aron madasig usab sila.” Mensahe sab niya sa kauban niyang katekista, “unta kita magkatambayayong pa sa mga moabotay pang mga kalihukan sa atong ministriya.” (Imelda Overiz | SRP SoCCom)