Lourdes ug Fatima, nag-abot sa Bangkal

Bulahan ang mga parokyano nga nakasinati sa pag abot sa imahe sa Our Lady of Fatima sa Our Lady of Lourdes Parish, Bangkal niadtong Pebrero 6, lima ka adlaw sa nobena una pa man ang kapistahan sa Parokya.

“I love you, Mama Mary!,” “Viva, Maria!” mao kini ang singgit sa kalipay sa mga sakop sa GKK nga gahulat sa kanto Tahimik, Bangkal, sa dihang nilabay kanila ang imahe sa Our Lady of Fatima.

“Lord, ayaw paulana,” ampo ni Meraflor Palar, katekista sa OLLP samtang gahulat sila kanto sa Central Park aron mag abi-abi sa pag-abot sa imahe.

Sa Parokya, gisugat siya sa mga gagmay’ng bata sa Jesus and Mary Thevenet School, sa mga theologians sa ReMaSe, ug sa mga miyembro sa mga GKK, Catholic Women’s League (CWL), Legion of Mary, ug uban pang Marian organizations.

Ang Santos nga Misa gipangunahan sa Kura Paroko Fr. Dexter Veloso. “Si Maria ang magdala kanato kang Hesus,” matud ni Fr. Dexter sa iyang homiliya. “Ang iyang mga apparition naghagit kanato nga kita mahimong kasandayong ug katambayayong niya sa grasya alang sa katawhan, partikular dinhi sa atong Parokya.”

Si OLLP PREX Assistant Coordinator Kuya Al Rabanes miingon nga nadasig siya ug nahagit sa pag-abot sa imahe gikan sa Portugal. “Maninguha ta nga makakuha ta’g atong imahe sa Birhen sa Fatima aron makapahigayon pod tag atong reparation sa atong Parokya.”

“Ang akong kasingkasing puno sa kalipay,” matud pa sa OLLP Head Cathechist nga si Beberly Alcayde. “Wala ko magdahum, nakahikap jud ko sa tungang gabie human sa bihilya kay Mama Mary, ang Birhen sa Fatima.”

“Yehey! Si Mama Mary moanhi sa among balay!” singgit sa kasadya ni Mary Piastro, OLLP GKK SoCCom, sa dihang nikumpirma kaniya ang mga opisyales sa World Apostolate Fatima (WAF) nga ipahiluna sa iyang balay ang imahe sa Our Lady of Fatima sulod sa tulo ka oras gikan ala-una hangtud alas kwatro sa kaadlawon alang sa seguridad niini, dayon gibalik kini sulod sa simbahan una nisidlak ang adlaw.

Gikan sa OLLP, ang imahe sa Our Lady of Fatima gihatud sa parokya sa Immaculada Conception didto sa Mintal, Martes sa buntag, Pebrero 7.

Ang pagbisita sa imahe sa Our Lady of Fatima sa Davao kabahin sa centennial celebration sa pagpapakita ni Mama Mary didto sa Fatima, Portugal, sa tulo ka bata nga sila Lucia dos Santos, Jacinta ug Francisco Marto, niadtong May 13, 1917. (Vonz Hijada | OLLP SoCCom)