100 tuig sa pagpakita sa Birhen sa Fatima gilunsad

Opisyal nga gilunsad sa World Apostolate of Fatima of the Philippines (WAF-Phils) ang nasyonal nga selebrasyon alang sa ika-100 nga anibersaryo sa pagpakita sa mahal nga birhen didto sa Fatima.

Ang national launching gipahitabo sa National Shrine of Our Lady of Fatima didto sa Marulas, Valenzuela City. Gitambongan sa mga miyembro sa WAF-Fatima nga naggikan sa nagkalain-laing mga diyosesis sa nasud, ang maong paglunsad gitambongan sa mga deboto ug mga parokyano sa National Shrine of Our Lady of Fatima. Gisugdan ang selebrasyon pinaagi sa pag enthrone sa WAF Pilgrim Image of Our Lady of Fatima, dayon ang pag-ampo sa santo rosaryo. Misunod ang first Fatima Centennial Conference series diin ang speaker sa conference mao ang obispo sa Jaro nga si Arsobispo Angel N. Lagdameo, D.D.

Sa maong conference nangandoy ang maong Obispo nga ang mga deboto nga nakadungog sa mensahe sa Fatima nga unta ilang-puy an ang mga mensahe. Mihatag siya ug upat ka giya aron mapuy-an nila ang mensahe sa Fatima.

Una, ang pag puyo sa Kristohanong kinabuhi pinaagi sa pagtuman sa napulo ka sugo, sa pagbuhat ug maayo, sa pagpuyo sa mga birtudes, ug pag-kumpisal sa mga sala.

Ikaduha, ang pag-ampo matag adlaw sa santo rosary, kay mao kini ang pinakanindot nga pag ampo, ug pinaagi niini atong matagamtam ang kalinaw nga gipangandoy alang sa kalibutan.

Ikatulo, ang pagbuhat sa debosyon sa Lima ka Unang Sabado sa Bulan. Gihangyo kini sa Mahal nga Birhen aron mapadali ang pagbag-o sa Russia. Ang debosyon nagkinahanglan ug dedikasyon, pag ampo ug pagsakripisyo aron magbunga ug kahiusa.

Ikaupat, ang pagsakripisyo alang sa pagbag-o sa mga makasasala, pagdawat sa sakripisyo alang sa kompensasyon sa atong mga sala ug sala sa lain. Kini pakighiusa sa mga sakripisyo ug mga kasakit diha kang Hesus.

Paghuman sa conference, gipahigayon ang Santos nga Misa nga gipangulohan ni Arsobispo Angel N. Lagdameo, D.D. inubanan sa Obispo sa Digos, Guillermo V. Afable, Obispo sa Kidapawan, Jose Colin Bagaforo, Obispo sa Nueva Ecija, Roberto Mallari, Obispo sa Laoag, Renato Mayugba, Obispo sa Batanes, Camilo D. Gregoro, Kura Paroko sa National Shrine, Msgr. Bartolome Santos, Jr., ug ubang mga pari sa Malolos.

Gitapos ang selebrasyon pinaagi sa pagprusisyon sa WAF pilgrim image sa Birhen sa Fatima sulod sa simbahan. (Lawrence Vidanes)