GKK SoCCom meeting sa Buhangin, padayon nga ginapahigayon

Ang quarterly meeting sa GKK SoCCom sa St. Mary of the Perpetual Rosary Parish gipahigayon kaniadtong Enero 29, 2017, Domingo sa alas 9:30 sa buntag didto sa PSK Hall diin adunay 68 ka mga miembro ang mitambong.

Gisugdan kini sa pagsaulog sa Bible Enthronement nga gipangulohan ni PSL Chen Angco ug ang paghatag og higayon sa pag-ampo sa mga nagsaulog sa ilang adlaw’ng natawhan sa bulan sa Enero, Pebrero ug Marso 2017 nga gipangulohan ni Maria Teresa Lanceta Amor.

Human sa mga pag-ampo, misunod ang oras sa kura paroko alang sa iyang mensahe sa mga GKK SoCCom nga mitambong sa maong meeting. Gihisgutan ni Fr. Jess Samaniego nga ang tanan adunay katakos nga mosulat batan-on man o edaran p’wede mamahimong SoCCom member. Adunay mga pangutana gikan sa mga miembro nga gitubag usab sa kura paroko nga nahatagan og katin-awan.

Nagpasalamat usab si Fr. Jess nga tungod sa mga gi-post sa mga GKK SoCCom sa facebook page sa GKK SoCCom sa parokya nakahibalo siya sa mga panghitabo kon kalihukan sa matag GKK.

Sa business matters gihisgutan ug gipasabot ni Hermelita Mapute, Parish SoCCom Coordinator ang mga roles and functions isip usa ka GKK SoCCom, giduso ang monthly dues sa mga miembro nga tag P 10 kada miembro kada bulan, final profiling sa mga miembro, ang kalambigitan sa mga GKK SoCCom sa DXGN 89.9 Spirit FM sa programang “KASIKAS” ug sa Davao Catholic Herald Newspaper diin gi-awhag ang tanan nga maghatag og artikulo sa mga panghitabo kon kalihukan sa matag GKK.

Gipasalamatan ang tanang komitiba: worship, service, secretariat ug ang tanang mga nilihok sa ilang katungdanan alang sa kalampusan sa maong panagtigom. Gitapos kini sa pag-ampo nga gipangulohan ni Bro. Felix Bongcac. (Norie Santillan | SMPR Parish SoCCom)