Ikanapulog-walo nga domingo sa ordinaryo nga panahon

Eccl 1:2; 2:21-23/Ps 90: 3-4. 5-6. 12-13. 14. 17/
Col 3:1-5. 9-11/ Lk 12:13-21

Dayag sa atong pagpakabuhi dinhi sa kalibutan ang kabuhong sa mga panalangin sa Ginoo ug gipaambit kini Niya aron kita mabuhi nga malipayon. Gani wala gyud mahitabo nga miundang Siya sa pagpanalangin kanato kay wala gyud ni mo abot sa iyang panghunahuna ug pagbati. Mao nga angay gayud nga magpasalamat kita sa Dios sa tanang panahon.

Apan hinumduman nato nga gibuhat Niya kini aron madasig unta kita sa pagpaambit niini sa uban sa kaayo nga atong nadawat Kaniya. Kay alang sa atong kasayuran, gusto sa Dios nga makat-onan nato ang Iyang gibuhat. Nga pinaagi kanato madayag na usab sa uban ang kanhi Niyang nabuhat. Pagkanindot unta kon kini mahatagan og bili sa tawo.

Ang pangutana karon, kon nahatagan ba kini og kinabuhi sa tawo sa inadlaw-adlaw niyang pagpakabuhi niining kalibutan? Wala kaayo! Tungod kay kon basihan nato ang mga pagbasa karong dominguha, dili matago nga nagpasulabi pa gihapon ang tawo sa kalibutanhong kalipay ug mao kini ang nagtukmod sa tawo sa pagpuyo sa kinabuhi nga hinakog.

Ang atong ebanghelyo, nagpamatuod niini nga nagpasulabi gayud ang tawo sa iyang tawhanong pagbati, nga nagpakabuta-bungol na lang siya sa angay unta niyang mabuhat nga maayo.

Nahikalimot siya nga ang tanang niyang natagamtaman dili bunga lamang sa iyang pagpaningkamot, kondili gasa usab kini gikan sa Ginoo ug kini naghatag kaniya sa kahigayunan nga makat-on niya sa pagpaambit niini sa uban. Apan ang tawo mismo nagdumili nga mo buhat sa kabubut-on Ginoo. Mao kini ang ginaiingon, wala gayu’y katagbawan ang tawo. Bisag pag nasinati na niya ang ka abundasiya sa kinabuhi, dili pa gihapon siya ma kontento. Magpadayon pa gihapon ang iyang pagpaningkamot aron lang maangkon ang tanan. Siguro mao na kini ang naabot sa panghunahuna sa tawo nga mao na kini ang kinabuhi.

Mahimong basihan niining akong gipadayag karon, kining nagapanghitabo sa atong panahon karon. Ang mga dato naningkamot pang madato pag samot. Peru ang pangutana, naghunahuna pa ba sila sa daghang nag-antus sa kalisod? Usa nama’y nahitabo sa gitudlo ni Kristo kanato? May kabuluhan pa ba kini kanato?

Basi sa akong pagpamalandong, dako gayud ang posibilidad nga mamatay na lang sa dayon ang gitudlo ni Hesus, tungod kay ang tawo nagdesisyon nga dili na paminawon ang Dios. Buot ipasabot, gipatig-a na sa tawo ang iyang kasingkasing nga maluoy sa iyang isigkaingon. Niining tungura, madayag nga misantop na sa panghunahuna sa tawo nga wala na siya magkinahanglan pa sa Ginoo.

Apan alang sa atong kasayuran, daan ng nasayud ang Ginoo nga aduna kitay kahuyang sa pag-atubang ug sa pagdumala sa maong situasyon nga buhong kalibutanhong mga bahandi. Gani nasayud usab Siya nga aduna gayu’y katapusan ang maong pagpasulabi nato ug moabot gayud ang panahon nga magkinahanglan pa gihapon ang tawo Kaniya. Kay sa pagkatinuod lang, diha lamang Kaniya kita may kinabuhi ug may katagbawan.

Mao nga kining mga pagbasa nato karon dominguha usa lamang ka pamaagi sa Dios nga mahigmata kita kon unsa gayu’y maayo natong mabuhat nga malipay ang atong Ginoo ug ang atong isigkaingon. Nga ang paghinakug wala man gayu’y luna sa kasingkasing sa atong boutang Dios. Nan ato ba diay’ng tugutan kini mopuyo ug molambo sa atong kinabuhi? Kining tanan nag-agad gayud sa desisyon sa tawo ug nasayud usab kita nga ang Ginoo naghatag og kagawasan sa tawo sa pagpili ug sa kanunay gi-respeto Niya kini.

Hinumduman nato mga igsoon, nga taliwala sa atong pagkamakasasala – misalig pa gihapon ang Ginoo kanato ug gipaambitan kita sa pribilihiyo nga mo padayon sa iyang maayong buhat, nga mao pagkamanggihatagon  sa atong mga kaigsoonan. Timaan niini, makapila na kahigayon nga kita gipasaylo, gisabot ug gihatagan sa daghan ng higayon nga makabalik diha kaniya.

Nagpamatoud lamang kini kanato kon unsa kamangihatagon ang Dios kanato isip Iyang mga pinalanggang anak. Mao nga, nganong tagaan man nato og higayon ang dautan nga buhat nga maghari sa atong kaugalingon? Angay usab nga dili nato hikalimtan nga Ginoo nagtudlo kanato nga mas maayo pang huptan nato ang mga bahandi nga langitnon, sama na lang sa pagbuhat og kaayuhan sa atong isigkaingon, kay niining paagiha madayag kanato ang maayong pagkasumusunod ni Kristo. Dugang pa niini, ang pagbuhat nato og mga kaayuhan sa uban maoy usa ka maanindot nato nga pagpasalamat sa Ginoo sa tanan nga Iyang gipaambit kanato. Busa isip mga magtutuo, angayan lamang nga panganduyon nato sa kanunay ang paghatag kinabuhi sa gibuhat Kristo aron mamahimong sumbanan usab sa uban nga mo buhat sa ingon. Atong paningkamutan nga dili moundang diri kanato ang nasugdan sa Ginoo. Hinonoa mas mo lambo pa kini ug magpayon nga may kinabuhi nsa tanang panahon. Hinaut pa unta.

ni Fr. Gary Glen Yba
San Pedro Cathedral Parish