Parish priests nag-celebrate ug ‘debut’

SAN MIGUEL PARISH, PANACAN
FR. JUN GIMENO

Malipayong gisaulog ang ika-18 nga anibersaryo sa pagkapari ni Fr. Proceso ‘Jun’ Gimeno, Jr., kura paroko sa San Miguel Parish, niadtong Enero 14, 2017, sa Valle Verde Clubhouse, Panacan, Davao City.

Usa ka pinasahing programa ang sorpresang giandam sa mga parokyano pinanguluhan sa Parish Pastoral Team. Susama sa usa ka debut ang tema sa maong selebrasyon diin adunay 18 roses with 18 treasures nga gihatag sa 18 usab ka mga couple-parishioners.

Gihimo usab ang rigodon dance nga gipangunahan sa ginikanan mismo ni Fr. Jun nga sila Mr. Proceso Gimeno, Sr. ug Mrs Felicisima Gallosa Gimeno nga maoy unang misayaw kaniya ug gisundan kini sa 18 couples.

Aduna usab 18 candles ug ang matag mohatag niini ngadto sa celebrant mihatag usab sa ilang hamubong mga panghinaut alang kaniya. Makalingaw usab ang gihimong parade of 18 wines gikan sa pipila ka mga sakop sa lay ministers, PSL ug Knights of Columbus, ug misunod dayon ang wine toast.

Sa iyang speech, mipadayag sa iyang kalipay ug pasalamat si Fr Jun. Nabati gayud niya ang pagmahal ug suporta sa iyang mga parokyano, pamilya, kaubanang mga pari ug mga higala. Ang presensya sa matag usa matud niya, maoy nakadugang sa kamabulokon ug kamahinungdanon sa maong selebrasyon.

Iya usab gipasalamatan ang Dios nga maoy naghatag kaniya sa gasa sa pagkapari. Maoy panghinaut sa tanan ang pagpabilin nga mainiton, madasigon, mabungahon ug malipayong pag-alagad ni Fr. Jun sa simbahan isip pari. (Eleanor Pascua | SMP SoCCom)

HOLY FAMILY PARISH
FR. RICKY C. PENALOSA, DCD

Puno sa kalipay ug dakong pasalamat, malipayong gisaulog ni Fr. Ricky Peñalosa, DCD ang iyang ika-18 nga anibersaryo sa pagkapari, niadtong Enero 14, sa IWHA Gym sa Barangay Dumoy nga sakop sa Parokya sa Holy Family Parish.

Nagsugod ang selebrasyon sa usa ka Santos nga misa nga gipanguluhan mismo ni Fr. Ricky, inubanan ni Fr. Jose Marie Escuadro, Rev. Christopher Alcayde ug pipila ka mga seminarista nga na-assign sa parokya.

Ang selebrasyon gitambungan sa mga ginikanan, igsoon, kahigalaan ug mga parokyano ni Fr. Ricky nga kauban niya sa kalipay ug pagpasalamat sa gasa sa bokasyon sa pagkapari nga niabot na ug ika-18 ka tuig.

Ang selebrasyon gihimo isip pahalipay kay Fr. Ricky sa iyang tiunay nga serbisyo isip alagad sa Diyos nga kanunay nagaatiman sa iyang katawhan. Nahimong bibo ug makahuluganon ang okasyon tungod kay kini gisubay sa usa ka simpleng debut party nga naay temang “Hawaiian” diin ang mga nitambong nagsul-ob ug Hawaiian- inspired attire.

Kabahin sa gihimong aktibidad ang pagpaso ni Fr. Ricky subay sa nagsigang kandila nga gidala sa mga GSL isip simbolo sa pagsubay sa dalan ni Kristo, ang tuburan sa kahayag.

Adunay 18 ka espesyal nga regalo alang kang Fr. Ricky gikan sa iyang mga suod nga higala kinsa nahimong kabahin sa iyang kinabuhi. Ang 18 shots of wine gihimo usab isip pagpadayag sa dakong kalipay sa tanang kaayuhang nahitabo sa iyang kinabuhi isip usa ka pari ug panghinaot sa pagkab-ot sa iyang mga pangandoy isip suluguon sa Diyos.

Labaw sa mga materyal nga gasa, ang mga parokyano nga gikan sa nagkalain-laing GKK nagpakita usab ilang talento sama sa pagsayaw ug pagkanta nga nagdungag ug kasadya sa maong okasyon.

Ang mga higala, kaparyentihan ug mga parokyano ni Fr. Ricky nanghinaot nga siya magpabiling pari hangtod sa hangtod, ug kining tanan posibleng makab-ot sa walay hunong nga pangaliya sa Sagrada Pamilya ni Hesus, Maria ug Jose. (Flor Arellano-Deloria | HFP SoCCom)