Biblical ang pagpangga sa ginikanan

Dear KNOT,

Ang akong mama usa ka martir nga pagka inahan. Pito ming managsoon ug bisan sa kawad-on wala kami niya gipasagdan sa kalisod sa trabaho niya ang pag panangi (magharvest ug mais) sa kasilinganan nga mga uma. Ulan ug init gibalewala niya aron kami makakaon kay gibiyaan man kami sa among amahan. Kung wala gani anihonon mangulot na usab siya ug i-barter niya ang bayad sa humay ug tinapa aron daw mi makakaon ug lami-lami. Bisan sa ingon niana malipayon gihapon mi kay wala man mi gibulag sa among inahan.

Niabot ang panahon nga nilangyaw ang among magulang nga lalaki dinhi sa Davao City niadtong 1967, ug sa dihang nakasulod ug trabaho gipaapas kami niya dinhi sa Davao ug wala lang gihapon mi nagkatibulaag.

Tungod kay walay hibangkaagan sa trabaho sa siyudad, naglabada si mama kung buntag ug maninda ug sweepstakes ticket kung udto. Pagkahapon mamilo sa labada aron ihatud ug kami usab nagkahiusa nga maninda ug saging nga nilung-ang agig abag sa panginahanglan, kay kaming tanan gipaeskuela man bisan sa kalisod namo. Naay panahon nga bisan sa tag P10.00 pesos lang ang tuition di jud me makabayad.

Sa dihang kalit lang niabot ang among amahan nga walay dala, ug sige pa ug hubog, kanunay makulatahan ang akong mama. Bisan sa kangil-ad ug batasan sa among amahan, giantos gihapon niya kini. Ang dili naku makalimtan sa akong mama kanang panahon sa Christmas labi na sa pag-abot sa media noche, tapok jud mi mga anak ug mag-ampo dayun mangaon bisan pan ug margarine nga naay pansit ang handa, pagkamalipayon na namo. Daghang tuig nga ingon niana ang among kinabuhi matag pasko.

Karun ang akong mama ninety three (93) years old na, ug malipayon na siya bisan sa iyang pangidarun. Pensyunada na siya karun kay siya man ang beneficiary sa akong magulang mga military. Ug kami usab maayo na ang among mga trabaho bunga sa kahago sa among inahan. Usa ka higayun sa dihang nagkatapok mi naghisgot akong mga igsoon nga ibutang among inahan sa “home for the aged” aron daw naay mag-alaga. Nakasinggit jud ko nga “giantusan kitang 7 ka mga anak sa atong inahan nga dili ta magkatibulaag, karun siya lang isa dili ta makaatiman sa iyaha.” Wala jud ko makapugong ug hinilak, siguro naulaw sila, wala nadayon ug ako karun ang nag-atiman sa among inahan.

Palanggaon ug atimanon nato ang atong inahan o ginikanan aron mao usab kana ang buhaton sa atong mga anak kanato sama sa giingon sa 2 Col. 3:12-21. – Rose Jabonillo, San Pedro Cathedral SoCCom