Ipadayag ang Marianhong hulagway sa Simbahan

Tungod sa gipasiugdahan nga National Consecration sa Immaculate Heart of Mary niadtong Hunyo 8, 2013, nagkaanam na’g kamatngon ang daghang magtotoo,- obispo, pari, relihiyoso, layko sa kahulugan ug kamahinungdanon sa konsagrasyon ug pagtugyan ngadto sa Mahal nga Inahan Birheng Maria. Nagapalig-on kini sa atong pagtoo ug paghigugma ngadto sa Dios pinaagi kang Hesuristo, uban ni Maria atong Inahan.

Sa hinayhinay mahibalik sa mga katolikong pamilya ug mga simbahan ang pagdebosyon sa magsunod nga lima ka primerong Sabado diin moampo sa rosaryo ug mamalandong sa mga misteryo, mangompisal, moapil sa Misa ug mangalawat, mohalad sa iyang mga sakrispisyo ug maayong buhat alang sa pagkabig sa mga makasasala ug kapasayloan sa sala.

Dili katingad-an nga dali ra kini mokaylap tungod kay ang katolikomg Pilipino daan na nga Marianhon kaayo . Dayag kaayo ang atong pagka marianhon. Ato lamang lantawon ang daghan kaayong simbahan ug mga kapilya nga gipahinungod kang Birheng Maria. Nagkadaiyang mga ngalan ang gigamit – Del Pilar, Del Carmen, Immaculada Concepcion, Putling Kasingkasing, Lady of Manaoag, Mediatrix of all Grace,  Lady of Penafrancia, ubp. Matag bulan, dunay piyesta ni Maria nga ginasaulog sa tibuok kapupud-an. Daghan kaayong mga kapunungan ug katilingbang kristohanon sa mga kababainhan ug kalalakin-an nga nagdala sa ngalan ni Maria.

Apan, igo na ba kini?  Mao na ba kini ang hulagway sa Simbahang Marianhon? Makaingon na ba kita nga nagmalamposon ang gitinguha sa Dios nga kaluwasan alang kanato?

Aron matubag kining pangutana, kinahanglan mobalik gayud kita sa duha ka “fiat” ni Birheng Maria – ang iyang paguyon.  Ang una niyang “fiat” niadtong pagpahibalo sa Anghel Gabriel sa kabubut-on sa Dios alang kaniya. Ug nidawat ug niuyon siya sa pagbuot sa Dios. Nakig-unong siya sa Dios. Ang ikaduha niya nga “fiat” niadtong atua siya ug si San Juan, ug ubang mga babaye sa tiilan a Krus sa Kalbaryo. Niuyon siya sa pagbuot ni Hesus, mahimong siyang Inahan sa mga sumusunod ni Kristo, mahimong Inahan sa tanan.

Sukad niadtong panahona, kanunay nang anaa sa taliwala sa panaw sa mga magtotoo ang Birheng Maria. Gamhanang nagasaksi ug nagaumol siya sa mga tinun-an nga  magmasinugtanon sa kabubut-on sa Dios ug sa katilingbanon ug inigsoong pakiglambigit. Gipamatud-an gayud niya sa langit ug yuta nga siya “suluguon sa Ginoo.” Ang iyang pag-ampo ug pagsimba, walay pagkalahi ug pagkabulag sa iyang inadlaw-adlaw nga pamuyo. Mao kini mga igsoon, ang Marianhong hulagway sa katilingban sa mga matotoo – pagkamunngon ngadto sa Dios ug ang mahigugmaong panaglambigit.

Kini mga igsoon ang mas gikinahanglan nga masinati ug maipadayag nga klaro sa katolikong Pilipino karong panahona ngadto sa tanang katawhan. Hinumduman lamang nato ang giingon sa atong Ginoong HesuKristo, ” maila kamo nga akong mga tinun-an kon maghigugmaay kamo sa usag usa.” (Jn. 13:35) Ug sa lain pa, miingon usab siya, “tungod sa inyong panaghiusa, motoo ang kalibutan.” (Jn. 17:21) Ug sa katapusang hukom, ang sukdanan sa pagtimbang sa pagtoo ngadto sa Dios mao ang paghigugma sa isigkatawo labi na sa ila nga labing ubos, huyang, ug kabus (Mt. 25:31-52). Walay lain.

Dili igo nga magtukod kita’g simbahan o kapilya, magtukod og relihiyosong kapunungan, magdebosyon kita, ug magkonsagrasyon sa Mahal nga Birhen. Pipila lamang kini sa mga paagi ug instrumento sa pagpahigayon sa pagtoo. Dili kini ang bunga sa Maayong Balita sa kaluwasan nga gipasangyaw sa Ginoo. Ang tinud-anay nga pagpakabana, pagtinagdanay, pagtinahuray ug pagtinabangay, tungod sa buhing pagtoo kang Kristo, maoy magmugna ug kaangayan, kalinaw ug kauswagan sa kinabuhi alang sa tanan.

Mas makita ug mabati kining Marianhong hulagway sa Simbahan pinaagi sa pagsaksi niini didto sa mga pamilyang Pilipino, ngadto sa gagmayng katilingban ug sa mga gagmayng kasilinganan, mga gagmayng pundok sa mga nagkalainlaing sektor. Mga pundok nga ngadto ngadto magkatigom sa ngalan ni Hesus, ug maanaa Siya sa ilang taliwala uban ni Maria nga iyang Inahan. Dinhi niining mga dapita sa katawhan angay nga mangadto, magsaksi, ug magpadayag ang Simbahan sa iyang tiunay nga hulagway ug kasamahan.

Kinsa ang mohimo niini? Ikaw, ako, ang matag usa kanato nga mga tinun-n ni Kristo. Kitang tanan adunay nagkadaiyang bahin niini, sa matag luna, dapit, kahimtang, ug pundok diin  kita nahilambigit. Kamong mga Laykong magtotoo adunay mas dakong bahin niini, tungod sa inyong gidaghanon. mas dako ang inyong mahimo sa daghang dapit diin kamo nahiluna. Daghan kaayo ang anihonon, matud pa. Ang matag usa kanato adunay tawag, hagit ug higayon nga magbag- o sa nawong sa yuta ug sa dagan sa kasaysayan.q

Ang mga sumusunod ni Kristo ug mga alagad sa Simbahan angay nga dinhi mag-apostolado. Dinhi mahimo silang igpapatubo o libito nga makahatag ug bag-o ug mas baskog nga kadasig ug kalig-on sa tanan nga gibudlayan na ug nangaluya ug nagmasakiton, tungod sa mga palas-anon sa inadlaw-adlaw nga pagpakabuhi.

Kini ang dakong hagit ngadto sa atong mga GKK ug mga bag-ong simbahanong mga katilingban o movements diha sa Simbahan. Sila nga gidasig sa Spirito Santo ug giila sa Simbahan nga maoy haom nga tubag karon ngadto sa krisis sa pagtoo ug kinabuhi diha sa Simbahan ug sa sosyodad. Maumol unta ug mahimo kini silang mga tulunghaan sa paghinigugmaay ug panaglambigitay ug panaghiusa alang sa kaayuhan sa tanan. Sa ingon niini matukod ug motumao ang mga bag-ong pagpadayag sa Marianhong hulagway sa Simbahan taliwala sa tanang katawhan.  Viva Maria, Viva Hesus!

(jimmg48@gmail.com)