500 Club sa parokya sa San Pedro Calungsod gilunsad

Malampusong gilusad ang 500 Club pinaagi sa usa ka Santos nga Misa nga gipangunahan ni Fr. Ricky Flores niadtong Enero 8. Kini gitambungan sa mga indibidwal, pamilya ug grupo nga miyembro sulod ug gawas sa parokya.

Gipasalamatan ni Fr. Ricky ang mga miyembro sa positibong pagtubag ug pagsuporta sa “fund-raising activity” nga kasagaran lideres ug miyembro sab nga nasakop sa 19 ka Gagmayng Kristohanong Katilingban (GKKs).

Nagpasalamat sab siya sa Parish Pastoral Team (PPT) sa pagplano ug pagbisita sa mga miyembro sa tagsa-tagsa ka panimalay ug GKKs aron pagpasabot mahitungod sa proyekto.

Matud pa ni Roland Arado, usa ka GKK servant leader, ang pagsalmot sa Club taas nga pamaagi sa katilingbanong pagpakiglambigit ug pagtinabangay aron makab-ot ang tinguha nga mao ang paglikom og salapi aron itukod sa umaabot nga simbahan.

Ang 500 Club, usa ka “fund-raising activity” sa Parokya nga gilangkuban sa 500 ka miyembro. Ang matag miyembro mohatag ug P300 kada bulan, sulod sa usa ka tuig. Gibana-banaan nga makatigum ang proyekto og P1.8 million nga gamiton sa pagsugod sa pagtukod sa simbahan. (Lorelyn Lahoylahoy)