Be an inspiration

Excerpts from homilies, December 30 and December 31 (New Year’s Eve)

“God took our form.”

Gisugdan ni Yanong Muloy ang duha ka wali sa mahimayaong pagtimbaya tungod kay ang Disyembre 30, adlaw’ng Biyernes nasulod sa oktaba sa pasko. Mao kadto ang Biyernes sa Pasko, ang kapistahan sa Sagrada Pamilya. Oktaba ang walo ka adlaw nga pagmaya sa pasko, samtang sa Enero 1 mao ang ikawalo ka adlaw.

Iyang nakita nga nindot ug daku ang Belen sa Holy Family Parish nga nagsaulog sa ilang ikadose nga kapistahan niadtong adlawa. Busa iyang gipahinumduman ang tanang nanambong uban sa pagdayeg nga “i-target kada pasko, number 1 décoration sa balay, ang Belen.”

Unod sa wali nga ang Ginoo nagpakatawo. Aron masabtan pa ug mas mahinungdanon ang gibasa, gigamit niya ang analogy sa Miss Universe winner nga “mukopya sa nawong sa pinakamaot aron gusto niya mabati nga duol gyud sila niya.” Sama sa Ginoo, nga nagpakatawo, gikopya ang atong dagway, mibati ug kalipay ug kaguol, mihilak, gisakit, busa, nakasabot kayo kanato.

Sa iyang wali sa San Pedro Cathedral niadtong Disyembre 31 sa gabii, iya pung gipunting ang tinuod nga malipayong pag-atubang sa gasa sa panahon. Didto gisaulog ang Solemnidad sa Pagka Inahan ni Maria sa Dios Anak nga si Hesus. “Ang Mahal nga Birhen mao ang unang nakasaksi sa Emmanuel. God is with us,” matud pa ni Yanong Muloy. Dugang niya dili kita mahadlok sa kangitngit. Si Kristo ang kahayag. Diha sa diwa sa pagka-anaa pinaagi sa Mahal nga Birhen, makaingon kita nga happy new year.”

Gipahinumdum ni Yanong Muloy sa iyang duha ka wali ang kamahinungdanon sa pagtahud sa mga ginikanan, sama nga si Maria ug Jose gitahud man ni Hesus, ilang bugtong Anak. Dugang pa nga kitang tawo mag igsoon man ug kita anak sa Amahan, gani, “gisalig sa Ginoo ang iyang anak (sa duha ka tawo) nga si Maria ug Jose. “Taliwala sa kangitngit ang Diyos, tinuod gud nga Emmanuel. God with us!”

Hagit niya nga ang matag usa mamahimong inspirasyon karong 2017 sa uban.