Kamadrihan midonar og classrooms sa Cateel

MATI CITY – Gidonar ang usa ka concreto nga gambalay nga adunay duha ka classrooms para sa elementarya sa Sitio Bayong, Barangay Taytayan, Cateel, Davao Oriental.  Kini ang gidugang sa kanhi upat lamang ka mga classroom nga nangaguba usab sa panahon sa Bagyong Pablo.

Ang maong gambalay ginganlan og St. Marie Louise de Marillac building sa mga midonar niini nga mao ang pundok relihiyoso sa Daughters of Charity (DC) pinaagi ni Sr. Efleda Ferriols, ang superiora, human usab sa usa ka konsultasyon nga gihimo sa DC kang Obispo Patricio Alo ug Fr. Nestor Morata, kura paroko, sa miaging bulan sa Abril, kon diin gipangita sa kamadrihan ang usa ka labing kabus nga dapit nga nanginahanglan gayud og tabang sa edukasyon.

Gi-turn-over ang gambalay ngadto sa mga otoridad sa Bayong Elementary School niadtong Hulyo 13, 2013, sinasksihan sa mga opisyales gikan sa DepEd, LGU Cateel, ug sa parroquia ni Santiago Apostol.

Matud ni Fr. Morata nga Php1.2 Milyones ang balor sa gambalay, nga mao usab ang standard sa DepEd, ug nga karon anaa nay igong mga lawak pangklase sa unom ka classrooms, gikan Grade 1 hangtud Grade 6, kon diin usab ang kanhi tulo lang ka mga magtutudlo nga naghupot sa gi-combinar nga mga klase ang misaka na sa unom ka-buok, aron adunay usa gayud ka maistro o maistra ang matag ang-ang sa elementarya.

Gisaysay usab sa pari nga nagpuyo ang mga madre og duha ka bulan sa ilahang kumbento sa kaparian sa Cateel samtang gigama pa ang gambalay; ug nga giapil nila sa ilahang apostolado ang pagpahigayon og mga medical mission ug feeding program alang sa mga bata.

Dako usab ang pasalamat ni Fr. Nestor, lakip sa mga kabarangayan sa kamanggihatagon sa mga mitabang pagdonar, pinaagi sa mga Daughters of Charity.

Dugang pa niya nga, sa laing bahin, nagpadayon ang pagbendita niya ug ubang kaparian sa lain-laing mga hut-ong sa bag-ong gagmayng housing units sa Cateel, Boston, Baganga, Kinablangan, ug Lambajon, nga gitabang pagpatukod sa mga NGOs sama sa Catholic Relief  Services (CRS), CBCP-NASSA-Caritas New Zealand, ICRC, ug PLAN International.

By Sr. Marietta H. Alo, OND/Contributor