Singles sa Calinan, nanaygon, nanghatag ug pinaskuhan

Nakabati na ba ka’g nanaygon, nga sila hinuon ang nanghatag ug pinaskuhan?

Nagpahigayon og outreach program ang Singles for Christ (SFC) Calinan Chapter pinaagi sa pagpanaygon sa duha ka napiling pamilya isip “recipients” niadtong Disyembre sa Barangay Gumalang, Baguio District, Davao City.

Pagkahuman sa ilang Christmas Party, ilang gitapok ang ilang mga dalang “grocery items.” Ang uban nag-contribute og kwarta aron ipalit og bugas. Nag-andam sab og gitara ug kantang pamasko ang grupo.

Pinasahi ang gihimo sa grupo tungod kay imbis na ang nanaygon ang hatagan, sila na hinuon ang nanghatag og pahalipay sa nanginahanglan. Kini ideya sa Chapter Couple Coordinators nga sila Celeste Gallawan ug Juvy Gallawan.

Dakong kalipay ang nabati sa grupo ilabina na ang duha ka pamilya nga bulahang napili sama nila Artemia Mamondag ug pamilya ni Dante Oboc.

Si Artemia, usa ka miyembro sa Kaulo tribe, walay permamenteng trabaho ug dagha’g anak. Samtang si Dante, unom ang anak ug manakaay ug lubi sauna, apan karon, usa na ka Person with Disability (PWD) tungod kay nahulog siya sa lubi nga iyang gisak-an. “Sila ang mga taong nanginahanghan,” matud pa ni Charisa Galvan, usa ka Household Head sa SFC. Siya ang naghatag sa ngalan sa duha.

Dugang ni Patrick James Arsaga, Chapter Head, nga nalipay siya nga nakahatag ug nakatabang sa ubang tao sa ginagmay nga paaagi. (Lorelyn Lahoylahoy)