Ground-breaking sa Shrine of the Blessed Virgin Mary natigayon

Atol sa kapistahan sa Inmaculada Concepcion niadtong Disyembre, natigayon ang groundbreaking sa Shrine of the Blessed Virgin Mary sa Brgy. La Union, sa lungsod sa San Isidro, duol sa may Mt. Hamiguitan Eco-Park. Gisugdan kini pinaagi sa enthronement sa imahe sa Mahal nga Birhen, Mediatrix of All Grace, dayon ang misa nga gipangunahan ni Fr. Joselito C. Basilad, parochial vicar sa San Isidro Labrador Parish sa Bato-Bato, San Isidro, Davao Oriental.

Gihimo ang groundbreaking human sa kasaulogan sa Misa, nga gipangunahan nila ni Congresswoman Corazon N. Malanyaon, Mayor Justina B. Yu, ug Daughters of Mary Immaculate International (DMII) diocesan regent Sis Virginia David.

Sa iyang wali, gisaysay ni Fr. Jojo ang pagka-espesyal nga nilalang sa Mahal nga Birhen, nga natawo nga gawasnon gikan sa sala agi’g pag-andam kaniya nga mamahimong Inahan ni Jesukristo, kansang kapistahan – Mary, Mother of God—saulogon sa Enero 1, samtang natunong ang groundbreaking sa solemnidad usab sa Inmaculada Concepcion.

Atol sa maong okasyon, miluwat sa iyang mensahe si Cong. Malanyaon nga nagpahayag og dakung kalipay nga natuman gyud ang proyekto nga dugay nang gihandum sa DMII; ug nga hugot kini niyang gisuportahan agi og pagpasalamat sa mga pagtaliwala sa Mahal nga Birhen kaniya, hilabi na sa iyang pagpangatungdanan isip kanhi gobernadora sa probinsiya.

Gipasabot pa niya nga napamatud-an ug nasinati niya ang “milagrosong pagpataliwa ni Mama Mary sa daghang higayon niadtong panahon nga gihapak ang probinsiya sa bagyong Pablo kay lisud ug dili gyud nahimong sayon ug dali ang rehabilitasyon sa Davao Oriental kung dili pa sa gahum sa pagtuo ug pagsalig sa Diyos pinaagi sa iyang Mahal nga Inahan ug atong Inahan, si Mama Mary.”

Nasayran nga aduna’y tulo ka mga lugar nga gipilian unta kung asa pagatukuron ang shrine. Unang gipilian ang Pujada Island, apan usa ka disaster prone area ang maong lugar; ikaduha ang Badas, apan dili usab haom ang maong lugar alang sa Shrine. Human na-inscribe ang Mt. Hamiguitan isip world heritage site sa UNESCO, napalig-on ang suygot nga sa Brgy. La Union na angay tukuron ang shrine, tungod sa pagka- duol niini sa world heritage site, ug ana-a kini sa bukiron nga bahin nga nagpakita sa pag-welcome o pag-abi-abi sa Mahal nga Birhen sa katawhan nga mobisita kaniya ug sa uban pang bahin sa maong lugar. Daku usab ang pasalamat ni DMII regent Sis Virginia David sa tanang nahimong kabahin sa katumanan sa ilang damgo. Matud pa niya, makanunayon ang iyang paglibot-libot sa mga parokya sa diocese aron mahimamat ug madugangan ang mga miyembro sa DMII. Ang DMII ang aduna na karoy kapin 600 ka mga sakop gikan sa kinatibuk-ang diyosesis sa Mati, ubos sa ilang spiritual director nga si Fr. Ronie B. Orellanida, paraochial vicar sa San Salvador del Mundo parish sa Caraga, Davao Oriental.