Artes de San Vicente gi-team building

Nalipay ug nakakat-on ang mga miyembro sa Artes De San Vicente (ADSV) sa kinaunhang Team-Building ug Strategic Planning nga gipahigayon niadtong Sabado, Nobyembre 25 sa DTI Conference Room. Matud pa sa ADSV president, Lea Bernaldez, nanghinaut siya nga masustenir ang organisasyon pinaagi niining aktibidad.

Panglantaw kon vision sa grupo nga “makatabang sa mga walay trabaho nga batan-on, out-of-school youth ug makatrain sa senior high school. Sa dili madugay, gusto sa grupo nga mamahimong nag-unang supplier sa t-shirt, bags, polo shirts ug uban pang souvenir items; nga sila usab manguna sa pagpanahi sa taas nga kalidad.

Nigawas sa pagplano nga gusto sab nilang makaapil sa trade fairs, ug uban pang sewing skills training, mag exhibit sa malls, ug magrecruit pa ug mananahi ug printers.

Nagsugod niadtong 2009 sa San Vicente GKK sa Vincent Heights, ubos sa St. Francis of Assisi – Laverna, ang Artes de San Vicente usa ka livelihood project diin ang mga batan-on nagsugod ug himo ug Romblon bags making. Sa paglabay sa katuigan, hinay hinay na kining ni expand sa pagprinta ug t-shirts, ug uban pang souvenir items nga nakatabang sa katilingban hilabi na sa mga batan-on, mga nanay, ug tatay.