Tuig sa Parokya (Part 3)

LAING MGA GAGMAYNG KRISTOHANONG KATILINGBAN

Gawas sa mga GKK, ang Spirito Santo nagdasig usab nga matukod ug mokaylap ang laing mga gasa (karisma) alang sa Simbahan nga nakatabang usab sa kalamboan sa pagtoo. Kini mao ang gitawag nga mga bag-ong simbahanong katilingban o bag-ong simbahanong realidad. Mga gagmay’ng katilingban gihapon kini sila, apan gilangkoban ug sakop gikan sa lainlaing mga parokya (transparochial).

Akong nakita ang paningkamot nila sa Parish Renewal Experience, sa Couples for Christ, ang sa lain-laing grupo sa Catholic Charismatic Renewal, ang sa Neo Catechumenal Way, ang sa Focolare, ang sa Brotherhood of Christian Businessmen and Professionals ug ang sa Bukas-Loob sa Diyos Covenant Community, ug uban pa.

“Giila sila sa Simbahan ug gidawat nga mga gasa sa Spirito Santo alang sa Simbahan. Giawhag ang tanang mga Obispo ug kura paroko nga tagaan sila og igong pagtagad ug pag-awhag ug pagdumala aron malikayan nga magkinaugalingon lamang sila og lihok sulod sa parokya ug diyosesis. Sa ingon mokusog pa ang paglambigitay nila.”

BAG-ONG PAGSANGYAW SA EBANGHELYO (New Evangelization)

Nausab na ang panahon, ang kultura, ang palibot. Bisan tuod daghan kayo kitang Katoliko dinhi sa atong nasud nga Pilipinas, apan ang kamatuoran mao nga nagkadaghan ang nagadakong Katoliko, apan kulang kaayo sa kasayuran ug pagsabot sa ilang gitoohan. Tungod niini ang kadaghanan walay klaro sa ilang pagkamagtotoo. Wala usab sila magpakabana sa ilang GKK ug Parokya.

Gimando na kaniadto pa human sa Ika-2 Konsilyo Plenaryo sa Pilipinas (1991), kinahanglan nga sa atong mga parokya organisahon pagusab ug pahingusgan ang pagsangyaw sa Ebanghelyo ngadto sa tanang mga tawo. Tinguhaon nga magbunga kini sa pagbag-o sa ilang kinabuhi ug magpadayon nga mohamtong nga sumusunod ni Kristo. Dihang nahimo na silang mga tinun-an ni Kristo, mamahimo usab silang magsasangyaw ni Kristo pinaagi sa ilang mga pulong ug buhat.

Niining bag-ong Ebanghelisasyon, tagaan og dakong pagtagad, una sa tanan, ang mga kabataan ug kabatan-onan. Imatuto sila sa Kristohanong kinabuhi, pinaagi sa pagsaksi sa matoohong pamilya ug katilingban.

Ikaduha, ang mga nagmaluyahon, nahilayo na ug nawala na nga mga Katoliko maoy adtoon, tagdon, kuyugan, tabangan ug sangpiton nga mobalik sa pagpanaw uban sa Simbahan. Ngadto-ngadto human mabag-o, sila na usab ang mosaksi sa ilang isigkabata, batan-on ug bisan gani sa mga hamtong nilang ginikanan ug kaigsoonan.”