Immaculate Conception – Peñaplata

Nagsaulog sa ika-64 nga pagsaulog sa kapistahan ang Parokya sa Immaculada Concepcion-Penaplata, Island Garden City of Samal, subay sa tema: “Birhen Maria, lig-ong sumbanan sa ligdong panaghiusa ug gugma diha sa mga katilingban sa parokya.

Gipahigayon ang socio-cultural night sa Samal Gym. Kini gisalmotan sa mga parokyano ug ubang sector sa katilingban, lakip ang mga estudyante ug empleyado sa mga pribado ug panggobyernong establisyemiento. Dinhi gipakita nila ang ilang mga talent nga naghatag ug kalingawan sa mga katawhan.

Una pa man ang pista, ang Sakramento sa Kumpirmasyon gitambungan sa 156 ka binunyagan bisperas niini. Nangulo mao si Most Rev. Romulo Valles, DD.

Mismong adlaw sa kapistahan, gisaulog ang unang Misa nga gipangulohan ni Fr. Danilo Dotollo, DCD, kura paroko dayon ang alas 9 nga misa diin si Archbishop Emeritus sa Davao, Most Rev. Fernando Capalla, DD ang nangulo niini. Napuno ang tibuok simbahan sa kadaghan sa mga parokyano ug mga bisita nga nakigsaulog sa kapistahan. Pagkahuman sa Misa, ang mga parokyano naghiusa sa pagpangaon. Ang matag usa nanguli nga nabusog ang lawas ug kalag.