B-day gift kay Jesus

Hiyee! Bug-at ang bulsa sa kadaghanan nato inig ka Disyembre. Christmas bonus, 13th month pay, ug uban pang allowances ang ginadawat. Sa unsang pamaagi man nato ginahatag ug ginagasto kini? Ania ang usa ka istorya sa magtiayon nga supporters sa DC Herald ug DXGN.

Dear KNOT,

Sa dihang nadaot ang radiator fan sa akong sakyanan ug nangita ko ug surplus, nakahimamat ko si Joms nga nagapamati sa DXGN 89.9 Spirit FM. Ang among panaghigalaay nagsugod human niya mahibaw-an nga ako naga volunteer sa Davao Catholic Herald ug DXGN 89.9 Spirit FM.

Si Jomari “Joms” Tuhoy, usa ka Pangulo sa Liturhiya ug Extra Ordinary Minister for Holy Communion sa Zone 11, GKK Sto. Niño, Purok 22, parokya sa San Pablo. Kauban niya ang iyang asawa nga si Edith, usa ka Pangulo sa Katilingban. Napulo na ka tuig nanerbisyo sa Simbahan si Joms.

Dealer ang magtiayon sa Japan spare parts. Ang negosyo nagsugod sa Dacudao, dayon sa Cabaguio, ug karon sa Sta. Ana Avenue. Ilang nakita nga ang pag-ampo makatabang sa negosyo. Sama na lamang sa gisaysay ni Edith. Nagkadengue ang anak sa iyang usa ka higala ug nanginahanglan kadto ug operasyon. Nagpatabang kini kaniya pinaagi sa pagpa-ampo ug siya wala niya gibalibaran. Human ang pipila ka adlaw, wala na gioperahan ang bata. Sumala ni Edith, usa kadto ka milagro. Ang pag-ampo ilang giya sa inadlaw adlaw nilang kinabuhi. Sumala pa sa mag-asawa, dili kalimtan ang Ginoo, pinaagi sa pag-ampo, kay tungod sa pamalandong, dali ra nilang mahibaw-an kung sila nagkulang.

Ang magtiayon duha lamang sa mitambong sa gipahigayong “Ronda Parokya” sa San Pablo Parish niadtong unang Dominggo sa Disyembre. Sa pagkadawat nila ug sticker, ila dayong gisugdan ang pagpondo alang sa “25 Para sa Radyo ko.” Ila pong giawhag nga magsugod na sa paghulog ug sensilyo sa mineral water bottle ang ilang katapat nga pwesto.

Kung mulabay kamo sa Tuhoy Auto Parts sa Sta. Ana Avenue, mahibaw-an gyud nimo kung unsa ang ilang ginapaminaw tungod sa kakusog sa volume niini. Pamaagi kini sa mag-asawa sa pag share sa ilang blessings karong pasko ug pagdapit sa uban nga musuporta sa katolikong radio. – Jhong Magdaherin

* * * * * *

Salamat Jhong, Joms ug Edith sa inyong istorya. Hinaut nga kamo pud, maka share sa inyong blessings isip pasalamat sa pagbalik sa DXGN Spirit FM sa kahanginan. Volunteer, pledge, sponsor a program, tune in today. For more information, contact DXGN Spirit FM, 0949–788-7395 or visit DXGN Spirit FM sa Facebook.

Ipadayon imong tithings. Sa imong pagpalit sa tanang kinahanglan, di pud nato kalimtan ang ministriya ni Lord. Bahini pud siya sa iyang b-day. Malipayong Pasko mga higala! @dcherald