“Panlakaw kamo ug Paghimo’g mga Tinun-an sa tanang Kanasuran”
Mahitabo na ang 2013 WORLD YOUTH DAY (WYD) didto sa Rio de Janeiro, Brazil karong semanaha Hulyo 22-28, ubos sa tema “Panlakaw kamo ug paghimo’g mga tinun-an sa tanang kanasuran” (Mt. 28:19). Tua na ang atong Santo Papa Francisco aron makigtagbo sa molabaw pa sa 4M ka mga batan-on gikan sa 5 ka kontinente sa Africa, Asia, America, Europa, Oceania. Lakip na didto ang pipila sa atong mga batan-on gikan sa DADITAMA.
Tungod tingali sa kalayo ug kadako sa gastosonon sa pagbiyahe, dili kaayo daghan karon ang mangadto ug moapil sa WYD. Gani, bisan sa atong mga obispo dinhi sa Daditama, walay usa nga moadto. Duna tingali pipila ka pari, ambot kon dunay madre. Apan, angay natong matngonan ang kamot sa Dios sa kasaysayan, nga maoy nagpatigayon niining tanan.
Niadtong pagtapos sa ulahing WYD didto sa Espana, diin gipadayag nang daan ni Benedikto XVI, sa pagtapos niini, nga ang sunod nga WYD pagahitaboon sa Rio de Janiero. Niadtong tungora, wala pa nato mahibaloi nga moluwat diay si Benedikto XVI sa iyang katungdanan karong tuiga. Ug ang mopuli kaniya gikan sa kontinente sa America, diin nahisakop ang Argentina, diin nagagikan ang Santo Papa nato karon nga si Francisco. Tan-awa ra. Gipangandaman na jud diay. K.aniadto pa.
Ang atong Santo Papa karon gikan sa kontinente nga nagaugmad pa lamang, sama sa Africa ug Asia, Oceania. Gitawag nga “third world country”. Kabalo ba mo nga gikan niining mga kontinente ang kadaghanan sa mga katoliko karon? Ang duha ka nasud nga pinakadaghan og katoliko mao ang Brazil ug ang Mexico, parehas gikan sa America. Ang Pilipinas mao ang ikatulo nga nasud nga adunay pinakadaghan og mga katoliko, nia nga naginusa ra sa Asia. Alang kanako, timaan kini sa dakong tahas ug panawagan ug kahigayonan niining mga dapita sa kalibutan, nga matngonan ang mensahe gikan sa kalangitan. AFRICA, AMERICA, ASIA pagmata na, MANLAKAW NA KITA UG ISANGAYAW SI KRISTO.
Ang tema sa WYD karon, bahin sa misyon sa Simbahan alang sa pagsangyaw sa Maayong Balita ni Kristo ngadto sa mga kanasuran nga wala pa makaila ug mitoo ug midawat kaniya? Gipunting kini karon sa mga kabatan-onan niining mga kontinente. Ang mga batan-on kang kinsa ang umaabot nga mga katuigan anaa sa ilang mga kamot. Sama sa naandang madungog, ang mga batan-on maoy paglaom sa umaabot nga panahon. Dili ba?
Kining maong panawagan dili lamang alang sa mga mangapil didto sa WYD mismo sa Rio, apan alang usab sa tanang mga batan-on nga nabilin sa matag nasud. Apil kamong tanan niining “mobilization”. Busa tara na! MANGADTO NA KITA!
Angay baya pud natong hinumduman nga dili kini karon lamang nadungog sa mga kabatan-onan. Niadtong 1995 WORLD YOUTH DAY diri mismo sa Pilipinas gipalanog nang daan ang susamang mensahe. Niadtong panahona, gisangayaw ang tema, “Sama nga ako gipadala, ako usab nagapadala kaninyo”. Isangyaw si Kristo nga nahiguma sa katawhan. Sa pulong ug sa buhat, ipakita sa Katoliko ang mahigumaong dagway sa Dios ngadto sa tanan, ilabi na ang labing kabus ug labing nag-antos tungod sa pagdaogdaog, pagpahimulos, pagsalikway ug pagpasagad.
Busa, gibalik na usab kining panawagan alang sa Misyon karong sigloha, niining millenyoha tungod kay wala pa matapos ang misyon. Kapin pa sa katunga sa mga tawo niining kalibutan wala pa masangyawi. Ug labaw sa tanan, daghan pa kaayo nga mga isigkatawo nato nga wala pa makatagamtam sa hingpit nga kinabuhi nga angay sa tanang binuhat ug mga anak sa Dios. Sa ingon niini, ang kalibutan motoo sa kamatuoran sa atong gisangyaw nga pagtoo.
Pila kaha sa atong mga kabatan-onan ang matandog ug magpatalinghog niining panawagan, niining bokasyon? Mahinumdum ko karon sa kanunayng pagdapit ug pagawhag ni Bl. John Paul II kaniadto sa mga batan-on, “Ablihi ang inyong mga kasingkasing kang Kristo! Ayaw kamo’g kahadlok! Ablihi ang inyong mga kasingkasing!”
No Comments