Tuig sa Parokya (Part 4)

ANG MGA TULUNGHAANG KATOLIKO
Ang atong mga tulunghaang Katoliko sa diyosesis halos sabay sila natukod sa mga karaang mga parokya. Kabahin gayud sila sa kinabuhi sa Parokya, ilabi na alang sa dugang ug padayon nga pagtabang sa mga pamilya sa pagmatuto ug pag-umol sa mga kabataan ug kabatan-onan sa pagkinabuhing Kristohanon. Ang pagtudlo sa katekismo, pagsaulog sa mga sakramento, ug pagpahigayon sa mga buhat sa kalooy.

Apan tungod sa nagkadaghan nang mga buluhaton nga gipangayo sa DepEd ug sa CEAP, DACS ug uban pang mga pundok nga may kalabutan sa Edukasyon, ang Kristohanong pormasyon nihinay na. Usahay dili na kayo kusog ug dayag ang pakiglambigit ngadto sa ilang parokya. Sa laing bahin, ang parokya ug kadaghanan sa mga parokyano usab nagkulang sa angayang pagtagad ug pakiglambigit sa tulunghaang Katoliko isip dakong bahin sa ministriya sa parokya.

“Bisan sa kagamay sa mga tulunghaang Katoliko ug sa kadaghan sa ilang kaakuhan nga gisangon kanila, ang mga tulunghaan nato nagmalipayong nagpadayon sa ilang misyon diha sa parokya.”

Daghan kaayong salamat kaninyo nga mga nagdumala nga mga relihiyoso , ang mga magtutudlo nilang kauban, ang mga ginikanan nga nagatoo pa gihapon sa kamapuslanon sa edukasyon sa tulunghaang Katoliko, ug ang mga Alumni, ug labaw sa tanan, ang mga estudyante. Kinahanglan kaayo mo sa parokya ug kamo nanginahanglan sa usab sa mas kusog nga suporta sa parokya.

MGA STRUKTURA SA KAHIUSAN UG PAGSALMOT
Dunay tulo ka struktura karon ang atong mga parokya alang sa pagpahigayon sa kahiusahan ug pagsalmot sa misyon. Ang pari maoy gisangunan nga magbalantay sa parokya. Apan dili siya lamang. Ug dili mahimo nga magkinaugalingon lamang siyang magdumala. Gipahimutang sa Simbahan kining tulo ka struktura alang niining katuyuan.

Ang una niini mao ang Parish Pastoral Council (PPC). Ang tanang parokya, sumala sa paghukom sa Obispo, kinahanglan magtukod ug PPC. Ang PPC gituyo sa Simbahan nga mahimong kahigayunan ug paagi sa pakiglambigit ug pagtinabangay sa mga pari, relihiyoso, ug laykong lideres sa parokya aron maglantaw, magplano ug mag-implementar sa mga programa sa spirituhanon ug materyal nga kinabuhi sa parokya. Busa ang kura paroko, magdasig ug mag-awhag sa iyang mga ginsakpan nga moapil gayud niining mahinungdanong paglambigitay sa mga parokyano.

Ang ikaduhang struktura mao ang Parish Finance Council (PFC). Mao kini ang kauban sa PPC. Gihukman usab sa Obispo nga kinahanglan ang tanang parokya aduna niining PFC. Pinanguluhan sa Kura Paroko, sila ang hiniusang mangakuhan sa pagdumala sa tanang mga katigayunan ug panudlanan sa Simbahan nga gitugyan sa parokya alang sa pagtuman sa iyang spirituhanon ug materyal nga katuyuan, pinasikad sa pamalaudnon sa Simbahan.

Ang ikatulo nga struktura mao ang Parish Pastoral Staff ug mga nangulo sa mga apostolado. Pinanguluhan sa mga kaparian, kini ang mga tawo nga gisangunan nga mangakuhan sa lain-laing katungdanan sa pagpahigayon sa opisina, balay, simbahan, ug palibot sa simbahan. Kasagaran niini mga empleyado sa parokya. Ang uban volunteer o part time nga empleyado. Kini silang tanan nanaghiusa sa pagtuman sa ilang mga kaakuhan. Sila ang unang mga sumbanan sa malipayong panaghiusa ug makugihong pagsalmot alang sa katumanan sa misyon sa Simbahan.