Tuig sa Kalooy gitak-op sa Digos

‘Tugutan ang Diyos sa pagsulbad sa problema’ – pari

Si Most Rev. Gullermo D. Afable, DD, Obispo sa Diyosesis sa Digos ang misara sa Balaang Pultahan sa Mary Mediatrix of All Grace Cathedral, siyudad sa Digos, atol sa pagsaulog usab sa Diocesan Eucharistic Congress, sa maong Diyosesis sa parokya ni San Isidro sa Dona Aurora Extension, niadtong Nobyembre 18, 2016.

Gihimo kini agi ug pagtapos sa Hubileyo sa Kalooy nga gilusad sa atong Santo Papa Fracisco, niadtong Disyembre 8, 2015 hangtod Nobyembre 20, 2016. Ang maong kalihokan gisalmotan sa mga magtutuo gikan sa dos mil kapin ka mga parokyano gikan sa nagkalain laing parokya sa tibuok diyosesis sa Digos. Apil na niini ang mga magtutudlo ug estudyante sa St. Mary’s College of Bansalan, Inc. nga gidumala sa mga Religious of Virgin Mary (RVM) Sisters.

Gisugdan ang Diocesan Eucharistic Congress sa usa ka “theological reflection” ni Fr. Juan Macalisang, STL. Subay sa tema, “Ang Pilipinong Pamilya: Misyonerong Tinun-an sa Eyukaristiya.”

‘Kun ang pari muadto sa GKK, kinahanglan muadto ang tanan. Pangutana nioya, nakasabot ba ang mga magtiayon that without the Eucharist, walay mulungtad sa ilang kaminyoon…without communion, we are moving dead.”

“Hinaut unta dili nato angkunon ang tanan sa pagsulbad sa problema, tugutan nato ang Diyos sa pagsulbad niini,” matud pa ni Fr. Macalisang. Panapos niya, mao ang usa ka pangutana diha sa mga partisipante, “Sa unsang paagi makita nato ang epekto sa Santos nga Eyukaristiya sa atong kinabuhi?”

Misunod dayon ang “fellowship lunch” alang sa tanang mitambong. Gisugdan human paniudto ang “Eucharistic procession” nga nagsugod sa Parokya sa San Isidro, padulong sa Mary Mediatrix Cathedral.

Human sa prusisyon, gisugdan ang rito sa pagsara sa “Jubilee Door of Mercy” ug gisundan kini sa maong  “Diocesan Eucharistic celebration”.

Dako ang kalipay sa mga nag organisa sa maong kalihukan tungod kay adunay syento por syentong partisipasyon ang tanang parokya nga galangkob sa Diyoses sa Digos. 

Katuyuan sa maong aktibidad mao ang pagpasibaw sa “lights and shadows” sa mga pamilya diha sa pagkinabuhi sa Eyukaristiya; pag amgo sa mga hagit nga angay tubagon sa lain-laing kahigayunan; ug pagsaulog sa kamahinungdanon sa Eyukaristiya pinaagi sa Santos nga Misa diha sa Kristohanong pagkinabuhi. (Blaze Cantaros, Al Divinagracia, Nemric Umali, SUGID-Digos)