Pagtak-op sa Tuig sa Kalooy

Ang Lokal nga Simbahan sa Dabaw magpahigayon ug dakong kasaulogan karong Nobyembre 19, 2015.

Kini alang sa pagtak-op sa “Tuig sa Kalooy” nga giablihan niaging Disyembre 8, 2015. Trayntay nuebe (39) ka parokya sa tibook Archdiocese sa Davao ang magdungan sa pagpahitabo sa maong kasaulogan.

Sumala sa nauyonan sa mga kaparian niadtong Oktubre 10, 2016 atol sa ilang binulan nga Presbyterium meeting, himoon kini sa mabulokon ug maampoon nga pamaagi.

Sugyot nga unta dunay Pag-ampo sama sa pagpahigayon sa “Living Rosary” o “Divine Mercy Rosary Chaplet”; Pagpaminaw sa testimonya sa pipila ka mga layko kalabot sa ilang kasinatian sa Kalooy sa Dios; Pamisa ug Pagprusisyon.

Matud pa ni Fr. Johnny Autida, Kura Paroko sa Virgen de los Remedios ug kanhing Vicar Forane sa Sto. Rosario Vicariate, magpahigayon sila ug anticipated Mass sa Nov. 19. Dayon sundan kini ug pagbihilya diha sa Balaang Eyukaristiya. Pagatapuson kini sa Nobyembre 20, atol sa kapistahan sa Kristong Hari pinaagi sa usa ka prusisyon ug paghimo sa mga Buhat sa Kalooy ngadto sa mga kaigsoonan sa Parokya nga hilabihang nanginahanglan.

Kahinumduman nga sa tibook tuig sa kasaulogan sa “Tuig sa Kalooy,” ang mga kalihukan gipaningkamutan nga masubay sa tema “Maloloy-on Sama Sa Amahan.”

TUMONG SA TUIG SA KALOOY
Ang Archdiosesan Pastoral Council nga gipangulohan ni Arsobispo Romulo G. Valles, DD ug gipasayon ni Obispo George B. Rimando, kasamtangang Pastoral Director ug Auxiliary Bishop sa Davao, naglatid sa mga tumong pagpaniguro nga ang tema mapahigayon gayud.

Matud pa, ang unang tumong mao ang pagpaniguro nga masabtan ang Kalooy sa Dios pinaagi sa mga pagtoon sa mga dokumento sama sa Misericordiae Vultus.

Ikaduha, masaulog ug matagamtam ang Kalooy sa Dios diha sa kasinatian sa pagpahigayon sa mga sakramento, pilgrimages, ug uban pang susama niini.

Ikatulo, nga uban sa pagsabot ug sa pagsaulog, adunay mga hingpit nga pagpadayag sa kalooy sa Amahan pinaagi sa mga Buhat sa Kalooy.

Tuod man, ang mga nagkalain-lain nga parokya, GKK ug mga grupo nagbisita sa mga masakiton, binilanggo, nagpahitabo og pilgrimages ngadto sa Holy Door, midawat sa mga sakramento labi na ang Kumpisal ug Kalawat, ug naghimo sa mga Buhat sa Kalooy.

Si Arsobispo Valles nakig-istorya sa mga bata nga ginapakaon sa Archdiocesan Nourishment Center sa pag-abli sa extension niini sa Bucana niadtong Setyembre 30. (Kuha ni Brenda Milan)

ARCHDIOCESAN NOURISHMENT CENTER
Mabulokon kaayo kining tuiga kay nalusad ang ikaduha nga Archdiocesan Nutrition Center (ANC) diin maoy nagtabang pagpakaon sa mga bata nga walay kasigurohan makakaon matag adlaw.

Sa ngalan sa Arkidayosis sa Dabaw, gipirmahan ang SKP 2 Commitment Wall ni Arsobispo Valles uban ang partner agencies, sama sa University of Southeastern Philippines (USEP), TESDA, ug uban pa, niadtong Oktobre 7. (Kuha ni Alvin Hondos)

SAGOP KINABUHI PROGRAM 2

Nalusad usab ang ikaduhang “Sagop Kinabuhi Program” diin kini nagtabang sa mga kaigsoonan nga biktima sa ginadili nga druga; ug naablihan pag-usab ang Katolikong radyo, DXGN 89.9 Spirit FM nga usa sa dakong instrumento sa pagpalapnag sa kalooy ug gugma sa Dios sa katawhan.

Human malusad ang Katolikong radyo, ginapanghinaut nga magpadayon ang suporta sa hilabi na sa mga kampanyang pinansyal niini, sama na lamang sa 25 Para sa Radyo Ko. (PHOTO: DCH File)

Dugang pa, nahimong bibo ug buhi ang pito ka bikaryato sa Dabaw tungod sa gipahigayon nga International Eucharistic Congress (IEC) One-Day Experience alang niadtong mga Katoliko nga wala nakaapil sa IEC nga gipahigayon sa Cebu niadtong Enero 24-30, 2016. Kini isip paghiusa sa kasaulogan sa tuig sa Eyukaristiya ug Pamilya, uban sa tema: “Christ in Us, Our Hope of Glory.”

Mismong si Arsobispo Valles ang nagasaulog sa misa kada human sa pagsaulog sa IEC One-Day Experience Sharing sama na lamang dinhi sa San Pedro Cathedral nga gipahigayon sa Almendras Gym niadtong Oktobre 8. (Kuha ni Chen Angco)

Matud pa ni Arsobispo Valles, sa iyang homiliya niadtong Octobre 8 sa mga taga San Pedro Vicariate: “Ang pagsaulog sa Eyukaristiya, mao usab ang pagsaulog sa great Mercy of God…Ang Eyukaristiya mao ang LaMisa sa kinabuhi, mao ang pagsaulog sa kinabuhi nga gihatag kanato ni Hesus didto sa kalbaryo sa iyang pag-atubang alang kanato sa pinakabangis natong kalaban, pinakakusgan natong kalaban nga mao ang kamatayon.”

Midugang pa si Abp. Valles, “matag saulog nato sa Eukarisya, mao kini ang makahulma sa atong kinabuhi…kung dili kita manimba matag Domingo diha sa Eyukaristiya, magniwang gyud ta – burot kaayo ang lawas, niwang ang kalag…”

Lig-on nga gipahinumdum usab ni Abp. Valles, “Ang foremost natong memory nga maga influence sa atong tibuok kinabuhi, ang atong mga desisyon, ang atong mga damgo, ang atong mga plano must be controlled, must be influenced by that memory of God’s saving love for us: “Buhata kini sa Akong handumanan.”

Kusog nga gilauman sa mga Obispo ug sa mga kaparian nga ang katilingban sa mga tomotoo ni Kristo sa Archdiocese sa Davao makighiusa, molambigit ug aktibong mopartisipar karong Nobyembre 19 ug 20 sa mga kalihukan sa mga parokya isip hiniusang pasalamat sa dakong kalooy sa Dios sa Iyang katawhan. (Vicky Estoque-Anghag)