Estudyante sa St. Mary’s, nagpanawduaw

Kabahin sa pagsaulog sa Hubileyo sa Diosnong Kalooy nga gilusad sa atong Santo Papa Francisco gikan Disyembre 8, 2015 hangtud karong adlawa, Nobyembre 20, ang mga magtutungha sa St. Mary’s College of Bansalan, Inc. (SMCBI) mipahigayon ug panaw-duaw ngadto sa Balaang Pultahan didto sa Mary Mediatrix Cathedral, siyudad sa Digos, niadtong Nobyembre 15, 2016, adlaw nga Martes.

Sa wala pa buhata ang pagsulod sa Balaang Pultahan, ang mga estudyante, gihatagan una ug “recollection” ug katekesis mahitungod sa Hubileyo sa Kalooy, diin si S. Ma. Magdalena M. Monteza, RVM, Presidente sa SMCBI ang nangunay sa paghatag ug pagpasabot.

Si Angelica Mae Saavedra, BSED 3, Major in English, usa ka magtutuon sa naasoy’ng tulunghaan nag-ingon, “Gaan sa pamati, daw sama nga gikugos ako sa Diyos…gitawag ako niya pagbalik sa pagsubay sa Iyang dalan, aron angayan akong matawag nga anak sa Diyos.”

Matod pa nila ni Jacky Shan Alambatin ug Cristy Pagurayan, mga magtutuon sa samang kurso ug tulunghaan, gaan sa kasingkasing ang ilang gibati ug dili angay nga mahadlok sa kausaban. Dugang pa niana, si Arnold Gumapac, usa ka magtutuon ug sa samang kurso ug tulunghaan usab, mipadayag nga angay niyang pillion ang mga butang nga makapalipay sa Diyos.

Ang Balaang Pultahan dinhi sa Diyosesis Sa Digos gisarad-an niadtong Nobyembre 18, 2016.