Pakig-alayon sa Simbahan ug DILG sa Reformation Ministry gilusad

Pakig-alayon sa Simbahan ug DILG sa Reformation Ministry gilusad
Nagkahiusa ang Diyosesis sa Mati ug ang Dept. of Interior and Local Government (DILG) sa Davao Oriental sa pagtukod og balik sa programang “Ugnayan ng Barangay at Simbahan” (UBAS) nga gilusad pipila ka tuig na karon ang milabay, samtang gilusad usab ang programang “Mamamayang Ayaw sa Anomaliya” (MASA) ug “Mamamayang Ayaw Sa Ilegal na Droga” (MASID).

Kini ang gitaho ni Fr. Edilberto “Loloy” R. Mahinay sa CMN-Mati Radio/TV network human sa panagtigom tali sa mga representante sa DILG sa Provincial Capitol.

Gipasabot niya nga bag-ohay pa lang sab gilusad sa Diyosesis ang Voluntary Submission for the Reformation Ministry (VSR) agi’g tubag sa panawagan sa nasudnong panggamhanan nga magpatuman og mga programa alang sa rehabilitasyon ug repormasyon sa mga drug dependent, ug aron mahalikay pa sila sa dugang pagkahisukamod sa ginadili nga droga.

Kasamtangang gihan-ay pa ang konkretong mga lakang nga gilatid sa bag-ong ministriya sa pagtuman sa “unified service rendered for the drug victims.”

Matud pa, maglakip na niini ang mga pagpataliwala alang sa mga surrenderees nga boluntaryo usab motamod sa serbisyo sa rehabilitasyon o pagbag-o sa kaugalingon.

Gidugang pagpasabot sa pari nga adunay dakong papel o involvement/intervention niini ang ubang mga sanga sa lokal nga panggamhanan, nga gani nagalihok na karon, sama sa DOH, PNP, DILG, DSWD, PADAC ug PDEA.

Panghinaut niya karon ang hugot nga pagtamod sa 19 nga mga parokya sa Diocese alang sa pagkaplag sa hustong pamaagi ug kalampusan sa gilaraw nga ministriya ug ang pagtinabangay usab sa ubang nalambigit o interesadong pundok sa sosyodad ug sa simbahan, sama sa kabatan-onan sa Diocesan Youth Apostolate (DYA).

Kahinumduman nga niadtong Septiyembre 2016 sa panagtigom sa DADITAMA sa San Victor Island, gilantaw nga ang DYA maoy mo-pasilitar sa pagahimoong mga kalihokan, samtang mga short-term plans ang gilatid antes mahulma ang pinal nga plano.

Una, mao ang pagpalig-on sa information dissemination kabahin sa mga dautang epekto sa mga droga nga pagahimoon sa managlahing apostolado ug movements sa simbahan.

Ikaduha, mao ang pagsusi sa mga programa sa panggamhanan aron masayran kon unsa ang ginahimo nga mahimo usab sundon. Apan ang labing sayong aksyon, matud pa, mao ang pagpahigayon og mga sesyon sa panagtambag kon “counseling” ug pagsaulog sa Santos nga Misa sa mga higayon nga ipa-report ang mga drug victims or surrenderees sa nagkadaiyang mga barangay agi’g kabahin sa “monitoring after the voluntary surrender.”

Sa laing bahin, nalipay usab si Fr. Loloy sa gipahigayon nga “Roll Out Training and Seminar-Workshop for the screening and assessment of drug reformists” nga gipasiugda sa Provincial Health Office ug Philippine Drug Enforcement Agency di palang dugay. Gihatagan usab siya’g higayon sa pagpakigpulong sa mga mitambong sa seminar.

Conferment of 2016 SGLG Award to LGUs of Davao Oriental
Nadawat sa probinsiya sa Davao Oriental ug ubang unom ka mga Local Government Units (LGUs) niini ang 2016 Seal of Good Local Governance (SGLG) Award gikan sa Dept. of Interior and Local Government (DILG) sa miaging Nov. 2, 2016 sa Sofitel, Philippine Plaza, Manila.

Alang sa probinsya lakip ang LGUs sa Baganga, Caraga, Cateel, Lupon ug Manay, si Governor Nelson L. Dayanghirang ang midawat sa pasidungog, samtang si Vice-Mayor Glenda Rabat-Gayta usab ang midawat sa pasidungog alang sa siyudad sa Mati.

Ikaduhang higayon na kini para sa Davao Oriental nga sa miaging tuig gigawaran sa 2015 SGLG, ug karong tuiga gimintinar ang “total excellence based on upgraded criteria.”

Gipasabot ni DILG Provincial Director Yvette T. Sunga nga bisan pa man kon gibase ang pagsuta sa kanhi administrasyon, giila usab ang mga buhat sa kasamtangang administrasyon, partikular ang adbokasya sa peace and order ug hugot nga pagsuporta sa kampanya batok sa ilegal nga droga.

Niadtong 2011 nadawat sa Davao Oriental ang Seal of Good Governance Bronze award, sinundan sa Silver award sa 2012, ingon man ang 2012 Gawad Pamana Ng Lahi isip Regional Winner nga gilayong “mother of all awards and the highest that can be conferred a local gov’t unit by the DILG.” (Dugang detalye sa sunod suga)