Si Nanay Tibay ug batan-on sa Baguio

Dear KNOT,

Nagapadayon ang kadasig ni ma’am Primitiva “Tibay” Arado nga ilado sab sa tawag nga “Sister Arado” kauban ang mga batan-on sa Baguio District sa pag-ampo sa Santos nga Rosaryo sulod sa kapilya sa Immaculada Concepcion.

Kini ginahimo sa matag adlaw’ng Dominggo sa dili pa magsugod ang Santos nga Misa kada hapon.

Kabahin na kini sa iyang kinabuhi.

Kaniadto samtang nagtudlo pa siya sa Baguio Central Elementary School ug hangtod karon nga usa na siya ka retiradong titser, iyang ginaimbita ang mga kabataan sa elementarya ug sekondarya nga moapil sa rosaryo kada hapon, pagkahuman sa klase.

Nagkalain-laing henerasyon sa mga kabataan na ang aktibong nisalmot sa rosaryong iyang giorganisa.

Usa niini ang mga ka-batch nila Ian Bernardino, Ginalyn Dagooc, Perlie Rose Delos Nieves, Jan Joana Rosit, Julie Ann Remperas, Jan Jessica Rosit, Joy Cruel, Elvie Joy Espanueva, Crimson Luayon, Jan Marie Gamao, Marjorie Gamao, Mark Joseph Gamao ug sa kasamtangan ang batch nila Gab Booc.

Sa matag hapon, ginahapit ug ginatawag niya sa mga balay ang mga batan-on aron mosalmot sa rosaryo sa kapilya.

Ang ubang kabataan nagahulat sa gawas sa GKK samtang nagadula og mga “Larong Pinoy.”

Kada-abot niya mosugat mi sa iyaha pinaagi sa pagmano.

Sa kasamtangan, ang rosaryo ginahimo matag adlaw’ng Dominggo.

Padayon gihapon ang pagkuha sa attendance, pagpangutana kung naka-bless sa mga ginikanan, nakatabang sa mga lihukon sa panimalay, pagsimba, ug uban pa.

Padayon gihapon ang ministriya ni Sister Arado sa pag-awhag sa mga kabataan sa Baguio sa pag-ampo sa Santos nga Rosaryo.

Ang ubang batan-on nahimong nang mga lideres ug nagserbisyo na sa simbahan. Ang usa kanila nga si Mr. Vinson Luayon, seminarista na.

Adunay daku nga impluwensiya ang pag-ampo sa Santos nga Rosaryo. Salamat sa sakripisyo ni Sister Arado alang kanamo. (Lorelyn Lahoylahoy, SPCQP SoCCom)