“Lumad, Kabahin sa Maaghupong Pamilyang Pilipino”

Tema sa pagsaulog sa Indigenous People’s (IP) Sunday ang “Lumad, Kabahin sa Maaghupong Pamilyang Pilipino.” Kining maong tema posible nga adunay nagkalain-laing pasabot alang kanato. Apan kon hatagan nato kini ug kahuloguan diha sa aspeto sa atong pagpangalagad pinaagi sa mga programa nga gipasikad sa katilingbang lumad dako kini ug kalambigitan sa inadlaw –adlaw na pagkinabuhi.

Ug kon ipunting nato kini sa programa sa pagpanguma, ang Indigenous People’s Apostolate nagpasikad ug mga lakang diin ang pamilyang lumad matabangan sa aspeto sa panginabuhian.

Gisugdan pagmugna ang usa ka pundok sa katilingbang lumad sa Malabog Paquibato nga gitawag ug Malabog Tribal Farmers Association.

Kini gilangkuban sa mga pamilya nga dunay mga anak nga nagtungha pa ug gidawat isip mga iskolar sa IPA.

Nagsugod kini diha sa panaghisgot unsa man gayud ang angayan nga pagabuhaton alang sa kalambuan sa matag pamilya aron makatungha ang ilang mga kabataan. Tuod man, gihatagan sila ug “team building ug capability building seminar” alang sa pagsugod sa pag-mugna sa maong pundok ug gisundan kini sa pagsuroy – kon “educational tour” sa lideres didto sa usa sa mga farm sa Marilog aron ilang masinati ang kaanindot sa pag-tikad sa ilang mga yutang kabilin.

Atol sa pagsaulog sa IP Sunday niadtong Oktubre 9 karong tuiga, ug pinaagi sa mga tawo nga dunay malumo nga kasingkasing sa mga lumad, napang-apod apod ang mga binhi aron ilang ikatanum sa ilang mga uma. Gisugdan kini pinaagi sa pagbendisyon sa IPA Director Fr. Florencio “Jhun” Acedo, director sa IPA.

Magsubay sa organiko nga sistema ang pagpananum, tungod kay ato man usab gihatagan karon ug dako nga pagtagad kining gitawag nga “organic farming.”

Gani sa sunod nga lakang ipahigayon ang pagbansay sa paghimo ug organikong patambok ug pangpamatay sa mga muabot nga mga dangan sa pananum.

Ang pagpamaligya kon marketing sa mga abot niini mao ang bahin lihokon sa IPA. Aduna nay mukabat kapin sa 100 ka pamilya nga miyembro –benepisyaryo sa maong programa.

Ang gihandom sa katilingbang lumad ug ang IPA isip magkatambayayong nga mamahimong makabarog ang katilingban sa mga dagkong hagit sama sa politikanhon, edukasyon, ekonomikanhon ug kulturanhong kalambuan nga nilangkob sa ilang pagkalumad. Ang pamilya dunay dakong kalambigitan sa kalampusan niini mao nga nipunting kita sa pagpalambo nga nagasukad sa tibuok pamilya diin ang magtiayong lumad magtinabangay aron ug alang sa ilang mga anak labi na kadtong nag-tungha pa.

Busa kausa sa usa ka bulan himuon gayod ang panagtigum sa pamilyang miyembro lakip ang ilang mga anak nga skolar alang sa usa ka pormasyon.

Subay niining maong damgo , kining adbokasiya nga kabahin sa gitawag nato ug IP for PEACE nga nagkahulugan ug Indigenous Peoples for the Promotion of Ecological, Agricultural and Cultural Enhancement mahatagan unta ug dakong suporta kini alang sa kalambuan, kahiusahan ug sa kalinaw. (Genaro D. Guadalquiver, Jr. | IP Coordinator)