Kampanya sa pagrosaryo nagapadayon

Ang nasud nga nagaampo, malinawon.

Padayon ang panawagan sa atong Simbahan dili lang dinhi sa Dabaw apan sa tibuok nasud aron sa pag-ampo sa Santo Rosaryo alang sa kalinaw.

Kahinumdumang gipagawas ni “Yanong Muloy” ang Circular #35 Series of 2016 niadtong 19 Setyembre nga nag-ulohang PRAYER CAMPAIGN DUBBED “A MIILION ROSES FOR THE WORLD.”

Kining panawagan gikan man sa Catholic Bishops Conference of the Philippines (CBCP), nga gipanguluhan ni Abp. Socrates B Villegas, Presidente ug kasamtangang arsobispo sa Lingayen, Dagupan.

Gipanghinaut nga ang matag usa mag ampo sa lima ka misteryo sa rosary kada adlaw, gikan Setyembre 20 hangtud Disyembre 23.

Sulod sa circular, matag adlaw adunay probinsiya sa Pilipinas nga iapil sa pag-ampo sa mga pari, seminarista, tulunghaan, mga estudyante, empleyado, pamilya, GKK Servant Leaders ug miyembro, ug tanang layko sa Arkidayosis sa Dabaw.

Karon semanaha hangtud Oktobre 31, atong iapil sa atong intensyon ang Rehiyon 7: Oriental Mindoro, Palawan, Romblon, Rehiyon 5: Camarines Norte, Camarines Sur, ug Catanduanes, ug Masbate. Samtang ang Rehiyon 11 pagaampuan karong Disyembre 1 hangtud 6. Viva Maria! Viva Hesus!