Kinaiyahan sa Calinan ampingan

Niadtong Septyembre 18, Domingo sa gabii sa dihang mi bundak ang kusog nga ulan, nakasinati ang dakbayan sa dabaw ug ginagmay’ng baha sa kadalanan.

Pipila ka mga punoan ang nangatumba ug poste sa dalan ang nawad-an ug linya sa kuryente ug kitang mga naa diri sa sydad nag yawyaw na sa ginagmay natong nasinati.

Wala man lamang nato nahuna-hunaan, kung kumusta kaha ang atong mga kaigsoonang anaa sa kabukiran? Mitugpa ba sa atong alimpatakan ang kahimtang nila?

Ang distrito sa Calinan mahulagway nato nga duol kaayo sa kinaiyahan tungod kay daghan pa kaayong mga punoan nga atong makita ug sa bugnaw nga hangin nga atong masinati sa maong lugar.

Apan ang Brgy. Megkawayan sa maong distrito, usa sa suok nga dapit nakasinati sa balos sa kinaiyahan.

Ang ilang dalan nga nindot ug sementado naguba tungod sa kusog nga dagayday sa tubig nga naggikan sa taas nga bahin sa kabukiran.

Ang maong barangay sakop sa parokya sa San Roque, Malabog nga gidumala sa ilang kura paroko nga si Fr. Jojo Ortiz.

Ang maong dalan ang ginaagian sa atong mga kaigsoonang gadala sa ilahang mga produktong uma padulong sa atong mga palengke. Haruhay muagi dinhi padulong sa parokya sa San Roque. Busa, sa pagbiyahe ni Fr. Jojo padulong sa sentro, iyang nakita ang nagubang dalan. Makita ang dako nga epekto sa pagkaguba ning kinaiyahan nga untang gitugyan kanato sa kahitas-an aron ampingan.

Unsaun nalang ang panginabuhian sa atong kaigsoonang mag-uuma kon ing-ani ang mahitabo sa mga kadalanan sa atong mga kabukiran, unsaon nalang pagbiyahe nga sayon sa ilahang mga produkto?

Kitang tanan adunay tulubagon sa mga panghitabo sa palibot. Ma ordinaryong tao man kita o anaa sa buhatan sa gobyerno nga maoy nagadumala ug nagbuhat sa mga proyekto.

Kon sa matag lihok nato atong butangan ug gugma sama nga gihigugma nato ang atong kaugalingon, aduna unta kitay mas nindot nga palibot ug haruhay nga paminaw.

Kon atoa pa lang giatiman ang atong kinaiyahan ug tarong, sama unta kini gihapon sa hulagway sa gihatag sa Dios kanato. Angayan nga sugdan nato karun dayon ang maong kaugdahan nga pagmahal sa kinaiyahan, tungod kay kini alang sa atong mga kabataan ug sa mga umaabot pa nga kaliwatan. (Jane Imas, Training Asst. | Photos: Fr. Jemasol Ortiz)