Survival Camp sa Tagakpan ipahigayon

Nangandam na ang Junior Marello Youth sa San Francisco de Asis Parish – Tagakpan alang sa umaabot nga JMY Survival Camp nga mahitabo sugod Oktubre 27 hangtod Oktubre 30.

Kining maong Survival Youth Camp pagasalmutan sa mga youth officials sa nagkalain-laing parokya sa tibuok Pilipinas nga ginadumala sa Oblates of Saint Joseph.

Magsugod ang registration sa survival youth camp alas onse ang takna sa buntag. Pagasundan kini ug santos nga misa isip simbolo sa pagsugod sa upat ka adlaw nga camping.

Ang mga aktibidades sa upat ka adlaw nga survival youth camp mao ang mga sumusunod: cultural night, talks gikan sa mga OSJ priests mahitungod sa “Christian leadership,” ug pagbisita sa GKK sa San Francisco de Asis Parish kinsa sila maghatag ug mga regalo ug mag-ampo alang sa mga masakiton.

Sa katapusang adlaw, pagahimuon ang mga leadership games ug group dynamics, aron malingaw ug mapalambo nila ilang leadership skills.

Tumong sa maong survival youth camp ang kahiusahan sa mga kabataan aron mapalambo ang ilang leadership skills ug ang espiritwal na aspeto sa ilang kinabuhi, mapaambit ang kamaayo sa Ginoo sa lokal nga komunidad, ilabina nga ginasaulog karon sa simbahan ang Jubilee Year of Mercy. (Cindy Lupiba, SFDA SoCCom)