Kilegbeg Mission Station benepisyaryo sa Med Mission

Gisaulog sa Kilegbeg Mission Station (KMS) ang duha ka adlaw nga “Allaw na Lumad” o Adlaw sa Lumad kaniadtong Oktubre 8-9, 2016 subay sa tema, “Lumad: Kabahin sa Paghugpong sa Pamilyang Pilipino.”

Matud pa ni Gng. Ofelia Garcia, IPA Coordinator, ika-duha ka tuig na nila kining pagsaulog. Bunga kini sa inspirasyon ni Rev. Fr. Juan Maria P. Momo, DCD o mas nailhan nga Fr. Jomar, ang KMS Priest/Administrator.

“Adunay mga 2,000 kapin ka mga parokyano sa 19 ka mga GKKs. Ang KMS nahimutang sa San Antonio, Sta. Maria, Davao Occidental sa tuktok sa bukid. Lisod ug liko-liko ang batoon nga dalan nga nagsubay sa kilid sa pangpang. Daghan pa unta ang gusto magpatambal apan wala kini nahuman tungod kay hapon na ug kinahanglan mokanaug na sa bukid ang mga volunteers.”

Nagtigum ang mga lumulupyo sa unom ka barangay nga gialagaran sa KMS gikan sa mga tribong TagaKaulo. Gisaulog ang Santos nga Misa ni Fr. Jomar didto sa kapilya ni San Francisco Javier, ang Patron sa KMS; misunod gilayon ang usa ka parada padulong sa San Antonio Gym.

Gihimo ang Panawagtawag/Ritual/Dugso ug gisugdan ang mga contests: 1) Pagtagilan sa Kakan (Tribal Food Preparation) nga gisalmutan sa mga representante sa mga eskwelahan, barangay ug GKK; 2) Edel Dance/Tagunggo Dance Contest; 3) Pag-ubat-ubat/Dandanen o pag-asoy ug usa ka orihinal nga kasugiran (legend) sa Tagakaulo inubanan sa tradisyonal nga panul-ob ug gamit sa musika sa tribo; 4) mga lumba sa IP Games; ug 5) pasundayag nga gipangulohan sa matag Datu ug Punong Barangay sa 4 ka sona sa 6 ka barangay.

Pagka Domingo gisaulog ang Santos nga Misa didto sa kapilya ug ang pagdalit sa tradisyonal nga mga pagkaong Kaulo alang sa mga volunteers sa dental ug medical mission gikan Davao City, Digos City ug Malalag didto sa San Antonio Gym. Didto gipahigayon ang tibook adlaw nga dental ug medical mission, paghatag ug vitamins, tambal, pagkaon, mga sapot, tsinelas ug school supplies.

Ang Kilegbeg Mission Station (KMS) usa ka proyekto sa simbahang Katoliko nga sakop sa Diocese of Digos alang sa atong mga igsoon nga Indigenous People (IP). Nagpasalamat ang mga Tagakaulo ug si Fr. Jomar sa tanang miapil ug mitabang sa misyon. (Marian Raquel | Photos: Fr Juan Maria Momo, DCD)