Ang Amahan sa “Sagop Kinabuhi” Program

FR. EMMANUEL “Bong” GONZAGA

Kadaghanan sa mga Dabawenyo nakaila na kaayo sa iyang dagway isip Presidential Chaplain ug Spiritual Adviser ni Pangulong Rodrigo Duterte. Nailhan pud siya nga Kura Paroko sa San Francisco de Assisi sa Maa, Davao City. Siya si Rev. Fr. Emmanuel “Bong” Gonzaga, edad 55, ug 30 ka tuig na nga pari. Nagsugod siya sa Immaculate Heart of Mary Seminary sa Tagbilaran City, sa REMASE siya nagpadayon sa Theology, ug giordinahan siya pagkapari kaniadtong Abril 13, 1986 didto sa ilang lungsod sa Alburquerque, Bohol. Matud pa ni Fr. Bong, kung nagpabilin pa kadtong galingan sa iyang ginikanan, basin wala siya mahimong pari karon. Apan ang bokasyon sa pagkapari nagalatay gayud sa ilang pamilya kung diin sobra 30 na nga miyembro ang anaa sa pagkapari o pagkamadre. Bugtong siyang anak nga lalaki, samtang ang iyang bugtong usab igsoon nga babaye, si Sr. Lucille, nagmadre sa RVM Sisters. Matud pa sa iyang uyoan nga pari, Rev. Fr. (Col.) Vicente Tungol (retiradong Chaplain sa PNP ug pari sa Winnipeg, Canada), “Ang lungsod nga way pari, pobre. Dakung grasya sa Ginoo nga daghang mapari sa Alburquerque.” Igsoon sa papa ni Fr. Bong ang inilang Paring Bol-anon nga si kanhi Obispo sa Bohol Msgr Margarito Gonzaga, edad 95. Siya karon ang pinakatigulang nga Pilipinong pari ug ang unang pari nga gitugotan nga mosulod sa politika isip Mayor ug unya Provincial Board Member sa Bohol.

Matud pa ni Fr. Bong ang iyang inspirasyon sa pagpari mao ang iyang mga kabanay. Relihiyoso ang iyang mga ginikanan nga si anhing Atilano ug Felomina Gonzaga. Garbo sa ilang lungsod sa Alburquerque ang pagtahan sa ilang mga anak diha sa pag-alagad sa Ginoo. Nihit ug mga pulong si Fr. Bong kung ang hisgutan gani bahin sa iyaha apan aktibo siyang moestorya kung bahin sa iyang mga proyekto isip kura paroko: ang pagpalambo sa kinabuhi sa simbahan ug sa kinabuhi sa tawo, lawas ug kalag. Alang kaniya, importante nga panalipdan ang kabililhon sa kinabuhi, ilabina kadtong sa mga kabus. Kaniadtong kura paroko siya sa San Antonio de Padua sa Agdao sa tuig mga 2000 pataas, aduna nay daghang mga batan-on nga gitawag ug “rugby boys” nga nahilambigit sa daghang krimen sa lugar: pagpangawat, dili pagtuman sa curfew, rape ug murder.

Daku ang kabalaka ug daghan ang reklamo gikan sa mga lumulopyo tungod sa mga krimen ug patay sa mga addict, apan ang pangutana ni Fr. Bong, “duna ba tay gihimo bahin ani? Unsa kaha kung…”

Ug didto nahimugso ang Sagop Kinabuhi Program o SKP sa Agdao. Ang tumong sa SKP mao ang pagluwas sa kinabuhi sa mga batan-on gikan sa pagka-adik ug usab ang pagluwas sa kinabuhi sa mga lumulopyo gikan sa mga adik. Ang SKP nahimong nagmalampuson tungod sa suporta sa mga nagkalain-laing grupo sa katilingban sa Agdao ug sa lokal nga gobyerno, ilabi na sa Office of the City Mayor. Karon, tungod sa kadaku sa problema sa druga, gimugna ang Sagop Kinabuhi2 diin nagkahiusa ang mga pribadong sektor, ang gobyerno ug ang simbahang Katoliko aron sa paghimo ug mga paagi nga matabangan ang mga misurender nga nahilambigit sa druga sa pagbag-o sa ilang kinabuhi. Si Fr. Bong Gonzaga nagkanayon, “We will not only save lives but souls as well.” (Dili lamang mga kinabuhi ang atong luwason kungdi mga kalag usab) (Marian Carmela Raquel)