Kumbento, opisina sa parokya sa Indangan, natukod na

Katumanan sa pangandoy.

Kini ang nahitabo sa Our Lady of Miraculous Medal Parish sa Indangan, Buhangin District, Davao City sa nakumpletong pagtukod sa kumbento sa parokya ug opisina diha sa luna sa parokya.

Sumala sa kura paroko nga si Fr. Elneri Meñez, pangandoy sa parokya nga matukod ang simbahan, kumbento ug opisina aron magamit sa mga parokyano.

Sa pagbisita sa DCHerald niadtong milabay’ng Domingo, ika-7 sa Hulyo, nasayran nga gisugdan ang pagtukod sa maong gambalay niadtong milabay’ng Oktubre ug nahuman niadtong Hunyo.

Si Archbishop Romulo G. Valles ang personal nga naghatag og panalangin sa building niadtong Mayo 26 diin mibisita siya sa adlaw’ng natawhan sa kura paroko.

Sugod Hulyo 8, didto sa bag-ong opisina na gihimo ang transactions ug didto na usab nagpuyo si Fr. Meñez. Kaniadto, si Fr. Meñez ug ang kanhing kura paroko nga si Msgr. Martiniano Gorgonio didto nagpuyo sa usa ka balay sa subdivision sa Indangan duol sa parokya diin usab ang temporaryo nga opisina.

Gawas sa bag-ong kumbento ug opisina, usa sa rason nga ikalipay sa mga parokyano ang pagbalhin sa lugar sa misa didto sa parish compound. Ang kanhing parish hall maoy himoong temporaryo nga simbahan diin himoon ang pagsaulog sa Misa.

Kaniadto, ang misa ginahimo sa kapilya sa St. Joseph the Worker GKK nga sakop sa parokya.

Sugdan ang pagsaulog sa misa sa bag-ong lokasyon sa ika-16 sa Hulyo, kapistahan sa Our Lady of Mt. Carmel.

Mapasalamaton si Fr. Meñez sa mga tawo ug grupo nga midonar alang sa pagpatukod sa ilang bag-ong rectory ug parish office. Ug sa karon, gipangandoy nila nga makapatukod na sila sa ilang permanente nga simbahan aron didto himoon ang misa kada adlaw ug matag Domingo. (John Frances Fuentes/@dcherald)