GKK Night nakapadasig samot sa taga Malabog

Nagmalampuson ang GKK Night Presentation bisperas sa kapistahan sa San Roque Parish, Malabog. Matud pa ni Fr. Jemasol Ortiz, wala siya magdahom nga daghan ang muapil sa aktibidad. Nadasig sab siya tungod kay adunay mga sona o GKKs nga mga lagyo nga nangapil. “Kini higayon dili lamang sa mga hamtong apan sa mga kabatan-onan sad.” Sa katapusan, iyang mensahe gidapit ang tanan nga maminaw sa DXGN 89.9 SPIRIT FM.

Pipila sa mga komento mao ang musunod:

“Kini nagpasidungog kang Sr. San Roque, usa ka timaan sa panaghiusa sa katawhan. Nakaingon ko nga mabulokon ang maong pasundayag tungod ang matag sona nasayod nga kining tanan kabahin man sa kapistahan sa among parokya. Akong ipaabot sa tanan, hinaot sa kanunay anaa ang pagsuporta sa mga katilingban aron ang panaghiusa ug paghigugmaay magpabilin sa atong kasingkasing.” – Ruel Bonsobre, PSL Coordinator/Lay Minister sa SRP

“Usa ka ehemplo nga ang mga ginikanan mohatag ug giya sa ilang mga anak, aron sila ilang madala sa simbahan. Kasagaran karon, ang mga ginikanan kulang na ug panahon pagdala sa ilang mga anak sa Simbahan mao nga nagkatibulaag na ang ubang mga kabataan. Naghagit siya sa mga ginikanan nga unta kanunay giyahan ang ilang mga anak alang sa ilang kaugmaon.” – Jessielito Areja, kapitan sa Barangay Malabog

“Nalipay ako ug dako kay maskin sa gamay nga panahon sa ilang pagpraktris ,nakapasundayag gayod sila. Happy k okay wala pud nagpalupig ang mga batan-on sa presentasyon.” – Armando Luisen

“Nalipay ako ug dako maskin sa kalayo sa among GKK, nibaktas mi ug layo padulong diri sa Parokya sa Malabog, makahalad lamang sa talento alang kang Sr. San Roque ug sa atong Ginoo. Nabuo ang sonata nga KURATSA, gitara ug rondalya tungod pud sa tabang sa 3 ka GKK nga sakop sa sona 8. Wala kami nagdahum nga makadaug ug makadawat mi ug premyo.” – Maximo Pedrosa

(Imelda Overiz | SRP SoCCom)