‘Sangyaw sa Tanan’

Hagit sa mga katekista sa Tagum: Sangyaw dili lang sa GKK ug eskwelahan. Tungod sa nagkadaghan nga ihap sa mga mitalikod na sa Katolikong pagtoo sa mga kabukiran sa Tagum, “sangyaw sa tanan.”

Mao kini ang hagit ni Fr. Noel Gastones, ang Diocesan Catechists Director sa tulo ka libong katekista gikan sa nagkalain-laing bikaryato sa Diyosesis sa Tagum sa ika-upat nga Diocesan Catechists Convention nga gipahigayon sa St. Mary’s College of Tagum, niadtong Sabado, Septembre 17, alas 8 sa buntag hangtud alas 3 sa hapon.

Ang maong selebrasyon gipangandaman pinaagi sa panagtigum sa mga coordinators nga katekista sa matag parokya.

Matod pa sa organizer nga si Ms. Socorro Abad, ang mga kalihokan giorganisa aron madasig ang matag katekista dili lang sa parish level kondili apil na usab sa diocesan level hilabi na sa mga kalihukan niini. Dugang niya, pinaagi sa mga aktibidad magkahimamatay ang matag usa kanila, ug mas mapalawom pa nila ang ilang pagtoo ug “commitment” diha sa pagpangalagad sa Ginoo.

Mingsalmot usab sa maong panagtigum ang mga estudyante sa Saint Mary’s College nga miyembro sa ilang Catechist Apostolate Club. Sila, sama sa mga katekista sa simbahan nangalagad pinaagi sa pagtudlo ug Catechism sa Manga National High School.

Ang  maong aktibidad gisugdan pinaagi sa Santos nga Misa nga gipangulohan ni Fr. Bobby Genilla ug uban pang mga kaparian sa Diocese of Tagum. Nisunod usab ang paambit ni Fr. Jose Salvosa nga nakapatandog pag-ayo sa  mga katekista.

Mga presentasyon sa nagkadaiyang talento sa mga katekista ang nagpalingaw kanila pagkahapon.

Sa katapusan nahuman ang aktibidad nga hapsay. Matag usa miuli nga puno sa kaalam, gugma ug pagtulon-an isip magsasangyaw ug tagaumol sa kasingkasing sa mga bata.

Ang catechists convention ginapahigayon kausa sa tulo ka tuig. Ang mga partisipante nagikan sa sobra dos mil ka mga GKKs sa 46 ka parokya sa Tagum. (Earna Cadungog | La Paloma Mensajera, Tagum)