Disaster Operation Centers gisusi sa Mati

Disaster Operation Centers gisusi sa Mati

Baynte sais ka mga barangay disaster operation centers sa Mati City ang malampusong gisusi sa mga evaluators gikan City Disaster Risk Reduction and Management Office (CDRRMC), City Local Gov’t Office, Sangguniang Panglunsod, Committee on Public Order and Safety, ug DXHM radio station nga nag-representar sa Civil Society Organizations (CSO). Gihimo kini sa usa ka ‘audience’ tali sa mga barangay opisyal, peace keeping forces ug disaster responders.

Gitan-aw sa CDRRMC Action Officer nga si Alejo Sampiri ang panginahanglan og pagkaandam panahon sa kalamidad sa siyudad tungod kay kini “prone to flooding, landslide, typhoon, storm surge, earthquake, and tsunami.”

Gipasabut ni Sampiri nga sa pagkakaron, wala pa gayoy ekipo o device nga makatag-an sa magsingabot nga linog.

Dugang pa niya nga sumala sa pag istudyo, “the big one” ang gikahadlokan nga makaigo sa Mati, samtang si City Local Gov’t Officer Nida Moya ang nagduso sa pagsunod gayud sa ‘Listong Pamilyang Pilipino.’ Kini nagatudlo sa mga miyembro sa pamilya kabahin sa mga buluhaton sa panahon sa katalagman ug aron ang matag sakop sa banay makahibalo sa mga buhaton sama sa pag–andam og bag, balde ug mga container nga mahimong pun-on og pagkaon, sanina, tambal, flashlight, ingon man ang pagtabon sa mga importanteng dokumento ug mga contact numbers.

Samtang ang mga operation centers kinahanglan andam sa ilang mga ekipo ug utensils, ug nga mailhan ang nagkadaiyang mga evacuation centers.

Dugang ni Sampiri ug Moya dili angay batikoson ang mga kahuyang sa mga centers kondili lantawon ang mga pamaagi aron mapahingusgan ang pagtabang niini sa katawhan.

Kahinumduman nga sa miaging tuig, ang Best Prepared Disaster Operation Center mao ang Barangay Tam-isan ubos ni Punong Brgy. Sonny Rodriguez nga matud pa, nagpadayon sa pag-upgrade sa ilahang sentro. Nasayran nga sila lang ang nakapalit og ambulansya ug karon naka-angkon og duha ka motorized banca, digital BP apparatus, waterproof flashlight, ug uban pa.

Ang ubang mga barangay usab nakapalit og ilang ekipo sama sa generator set ug chainsaw.

Giduot sa mga evaluator nga sa disaster, “Ligtas ang May Alam.”

Ianunsyo karong Oktobre ang resulta sa pagsusi, atol sa Sambuokan Festival sa siyudad sa Mati.

MI brother mipaambit sa kasinatian

Ning Bulan sa Bokasyon sa Diyosesis sa Mati, una nang nagpaambit ang usa ka seminarista kon scholastic sa Ministers of the Infirm nga si Bro. Almar Roman, didto sa St. Camillus Hospital nga gidumala sa mga paring MI.

Kini atol usab sa pagsaulog sa Santos nga Misa alang sa mga masakiton sa Kapilya sa mga Martir sa naasoy’ng balay-tambalanan. Gipaambit ni Bro. Alma ang pagtawag sa Ginoo kaniya lakip na ang iyang mga personal nga kasinatian ug ‘encounter with the Lord,” hangtud nga nagdesisyon siya sa pagsulod sa Orden sa MI.

Gisaysay usab ni Bro. Roman kung giunsa niya pag-asikaso sa iyang masakiton nga lolo dihang nipuyo siya sa balay sa iyang apohan. Samtang nagpabilin si Bro. Almar sa Mati og usa ka semana alang sa iyang pastoral exposure kauban nila Fr. Marven Ruyeras, MI, hospital director, ug Fr. Roderick Tampis, MI, aron sa pagduaw sa mga masakiton, ingon man sa mga trabahante sa hospital.