Kasikas sa parokya sa Dacudao, Boarding house construction, tabangan

Ang Mary Help of Christians Parish nagpadayon sa pagpatindug sa iyahang mga istruktura. Usa niini mao ang pagpatukod ug “boarding house” nga gisugdan kaniadtong Hunyo.

Matud pa sa kura paroko Rev. Fr. Marcelino Benabaye, SDB, “alang kini sa mga estudyante nga nagpuyo tabok sa Davao-River nga nagabaktas padulong sa eskwelahan ug pauli; ang uban kanila nagasakay padulong sa eskwelahan apan nagabaktas pauli. Para pud kini sa mga pangulo nga naa sa lagyo nagpuyo nga dunay seminar sa siyudad ug kinahanglan sayo mugikan. Para pud kini sa mga stay-in seminar sa parokya, so at the same time, it is a boarding house and a seminar house.”

Ang funding niini naggikan sa bahin sa “Alay-kapwa” sa parokya donasyon, ug sa mga pangulo sa parokya nga mitabang ug miboluntaryo sa pagtukod sa “boarding house.”

Pangulong batan-on pormahon
Ang mga pangulong batan-on sa Mary Help of Christians Parish nagmugna ug growth activity sa tibuok parokya nga gisugdan niadtong Hunyo.

Matud pa sa Parish Youth Coordinator Juneza Perocho, kini alang sa pagpalig-on sa ilahang commitment isip mga pangulo aron musalig sa ilang mga kaugalingon nga mamahimo pang responsible sa ilang mga katungdanan “kay ang pagka pangulo magasugod sa atong kaugalingon.”

Subay sa temang, “Youth Serving Youth”, ang mga facilitator sa maong aktibidad miapil sa mga training nga gipangulohan sa Salesian Youth Movement (SYM) gikan sa Cebu niadtong Abril sa Don Bosco Training Center, Mati City.

Ang programa padayon nga ginapahigayon kada ikaduhang Sabado sa bulan diha sa Center meeting alang sa tanang Pangulo sa Batan-on sa parokya.