Paglahutay sa pagtudlo, katekista gipadala

Kapin singkwenta ka mga Pangulo sa Panudlo o katekista ang gipadala sa San Francisco de Asis Parish, Tagakpan niadtong Dominggo. Ang misa gipangulohan sa kura paroko nga si Fr. Peter Fancubila, OSJ.

Matud pa ni Fr. Fancubila, kinahanglan gayud nga muagi ug sending forth ang mga katekista aron malamdagan ug magiyahan sila sa espiritu santo sa ilang pagsangyaw sa Maayong Balita sa mga GKK og mga eskwelahan nga sakop sa parokya.

Dugang pa ni Fr. Peter nga kining maong pagpapadala sa mga katekista magtabang kanila aron sila makapadayon ug makalahutay sa ilang misyon isip mga katekista, ug mga sumusunod ni Kristo.

Sumala pa kay Manang Linda, usa sa mga gi-send forth nga katekista, nagmalipayon gayud siya sa dihang gibendisyunan sila ni Fr. Peter kay nabati gayud niya ang presensya sa Ginoo, ug iyang nasinati ang kahiusahan niya kay Hesus, nga usa ka maayong magtutudlo. Sumala pa niya nga andam na sila ug inspired na silang mutudlo sa mga bata.

Nagpasalamat ang tanang katekista sa oportunidad nga makatudlo ug makasangyaw sa pulong sa Ginoo. Ang pag send forth sa mga katekista usa lamang sa mga simbolo sa kaayo sa Ginoo. Ug usab, ang mga katekista sa San Francisco de Asis nagasaad nga sila mamahimong puno sa gugma nga maalagaron, ug “usa ka parola, nga mag-iwag sa kangitngitan.”