GKK San Roque Nagsaulog sa Pista

Gisaulog sa GKK San Roque sa Purok Crossing Tagakpan ang kapistahan sa ilang patron niadtong niaging Dominggo, Agosto 21. Gisugdan ang selebrasyon sa alas-10 sa buntag sa Santos nga Misa nga gipangulohan ni Rev. Fr. Peter Fancubila, OSJ, ang kura paroko sa San Francisco de Asis Parish – ang parokya kung diin miyembro ang maong GKK.

Gihisgut ni Fr. Peter sa iyang homiliya ang kamaayo ug ang dakong pagsalig ni San Roque sa Ginoo. Matud pa niya, ang mga katawhan nga nagasunod kay Kristo angay lamang nga andam mutalikod sa tanang butang ug pas-anon ang ilang kaugalingon nga krus. Isip mga Katoliko, andam pud unta ug abri ang mga kasingkasing sa pagtabang sa uban, ilabina sa labaw nga nanginahanglan susama sa gibuhat ni San Roque pinaagi sa pagpaayo sa mga masakiton niadtong unang panahon.

Human sa Santos nga Misa, gisugdan ang pagbunyag sa mga bata ug ang managlahing mga pa-dula ug mga pakulo sa mga nag-organisa sa piyesta. Nahuman ang celebrasyon pinaagi sa disco.

Matud pa ni Mrs. Evelyn Vallejo, isa sa mga GKK Turno Leaders, nalipay gayud siya kay giniyahan sa Espiritu Santo sa Ginoo, nahimong malampuson ang pagsaulog sa kapistahan nga giplanohan gayud ug tarong sa ilang PSK ug uban pang mga turno leaders.

Mapasalamaton ang tanang miyembro sa GKK San Roque Crossing Tagakpan sa tanang grasya nga ilang nadawat niining tuiga, ug sa malampuson nga pagsaulog sa kapistahan ni San Roque. Nagalaum sila nga mamahimong pang mas nindot og mas mabungahon ang ilang pagsaulog sa kapistahan sa ilang pinalanggang patron sunod tuig. Sila usab naga-ampo nga unta mubuhos pa ang grasya sa matag miyembro sa GKK, inubanan sa intersesyon sa Mahal nga Birhen Maria ug ni Señor San Roque. (Jeffren Miguel | SFDA Tagakpan)