GKK member instrumento sa pagtukod sa parokya

Wa siya magdahum nga mamahimong pangulo, apan wala gayuy nakahibalo sa plano sa Diyos sa matag usa kanato. Ang istorya ni Sis. Erlinda Sipalay gikan sa pagka miyembro sa GKK hangtud sa pagkadaug isip kinaunhang Parish GKK Coordinator sa Sta. Cruz Parish, Talicud Island, Island Garden City of Samal sugod Agosto 21, maghatag unta ug inspirasyon.

* * * * * *

Dear KNOT,

Tuig 2006 sa dihang nibalik ko sa Talicud island gikan sa Davao City. Di man ko nagaserve sa Simbahan, apan nagapaningkamut gyud ko nga musimba sa San Pedro o sa San Antonio Parish.

Maskin unsa kabusy, mamalengke sa Agdao, maghatag jud ko ug panahon sa Ginoo.

Pag abot nako sa Talicud balik, nakapangutana ko kung unsa may himuon sa tawo nga walay kapilya. Unsa diay mahimo nga mabalik ug tukod inyong kapilya? Kay nakita nako nga maskin wala ang GKK, naga renew gihapon ang mga GKK officers. Wala may structure, padayon gihapon sila. Ang pirmirong gitukuran sa kapilya gibaligya man. Naay luna nga donation apan wala lay kwarta. Mao nang initiate ko nga mag solicit pagka June. Gipirmahan sa mga pangulo, nagtukod mi ug sugod ug temporary nga building. Basi diay mudaku ra siya. Hangtud sa, natukod pirmiro ang atop pagka July. Ang mga kahoy nga gigamit gikan rapud sa daang kapilya.

Hangtud sa Nobyembre 2006, nagkasaulogan na mi. Nya pagka last Sunday of the same month, gipahigayon ang misa. Napistahan siya 2007 na.

Wala jud ko magdahum nga mamahimo kong pangulo. Di man jud ko ingon nga na elect kay dili man ko pangulo. Kuyog kuyog lang sa sugod kung naay meeting. Wa man sad ko kabalo unsay buhaton. Lingaw rapud ko. Hangtud sa giingnan ko nila, “Lin, pangulo na ka. Mao ba. Sige pangulo naman diay ko.”

Human ang tulo ka tuig, na-elect na dayon ko isip district coordinator. Pirmiro gi appoint ko, apan niingon ko nga mas maayo siguro kung muagi ug election. Busa, nagpatawag ug meeting sa distrito, nya midaug ko. After a year, gipapuli napud ko as Parish GKK Coordinator.

Nangayo ko ug tabang example sa paghandle sa meeting. Balintong ang mga meetings kay wala gyud koy alam. Apan natuon ra madugay.

Mao nang ako ang naggunit karon sa mga pangulo sa 14 ka GKKs. Mensahe nako nga mapadayunon unta ang paghimo sa responsibilidad sa mga GKK Servant Leaders. Kung naay problema, pasensya lang kay naagian napud nako.

Bag-o ko naging district coordinator, niagi sad ko ug kahiubos nung PSK pako, apan wa jud ko miingon nga muundang ko.

Tungod kay wala may laing mudawat sa katungdanan isip Treasurer, mao nang isip PSK ako say nahimong Treasurer.
Kay naga GKK visit man ko, giingnan ko nga dili na daw ko opisyales kay sige raman daw ko ug suroy, kay naga GKK visit man mi.

Nagbungkag ang GKK tungod sa kwarta. Gipasanginlan nga wala ko nagapasa ug report, apan giatubang nako ang mga alegasyon nga akong gitubag human sa Kasaulogan sa Pulong. Salamat sa Diyos sa among bag-ong parokya. – Erlinda

* * * * * *

Salamat Erlinda. Tinuod gyud nga misteryoso ang tawag sa Ginoo. Luyo sa pagka walay kahibalo, mutudlo gaydu siya. Salamat sa sakripisyo ug inspirasyon. Congrats Sta. Cruz! ‘Til next kwentuhan higala!