Panaw-duaw sa kaparian: Patron nga St. John Vianney, gihinumdum

Mipahigayon ug panaw-duaw ang 40 ka mga pari sa Arkidayosis sa Dabaw niadtong Lunes, Agosto 1. Nanukad sa parokya sa San Pablo padulong sa San Pedro Cathedral, Gihimo ang maong kalihukan isip usa sa mga aktibidad sa kapistahan ni St. John Marie Vianney, ang patron sa kaparian. Human sa prusisyon misulod sila sa “Holy Door” pinaagi sa usa ka rito una gisugdan ang misa.

Ang rector sa Regional Major Seminary nga si Msgr. Abel Apigo mipalawom nga ang maong kasaulogan gihimo isip pagsaulog ug pagbalaan sa Patron nga si St. John Marie Vianney. Nanghinaut siya nga si St. Vianney ang mamahimong panig-ingnan nilang mga pari.

Matud pa ni Sem. Zoren Abellanoza nindot kaayo ang iyang kasinatian kay sa maong pamaagi nabati niya ang gugma sa Ginoo, ug iya usab nasaksihan ang pagsulod sa atong mga pari sa Balaang Pultahan sa Kaluoy. (Jane Imas | Editorial Asst.)