Sr. Santiago Apostol parish, magsaulog sa ika-54 nga kapistahan

Ang kapistahan sa parokya sa Sr. Santiago Apostol pagasalmutan sa 58 ka GKKs gikan unom ka sona. Pagalangkuban kini og nagkalain-laing aktibidad nga apilan sa mga servant leaders karong umaabot nga Hulyo 24-25, 2016 subay sa temang “Ang kalooy maangkon sa pamilya uban sa pangaliya ni Sr. Santiago.”

Matod pa sa Finance Officer Lilian “Bing” Tan, ang kalahian sa selebrasyon karong tuiga mao ang pag andam sa mga aktibidad alang sa mga pangulo sa matag GKK. Sa miaging tuig, kasagaran miyembro lamang sa parokya ang maong nag apil apil. Mas nidaghan sab ang ilang mga sponsors sa Misa bisperas sa kapistahan ug sa mismong adlaw.

Sa Hulyo 25, pangulohan ni Fr. Jun Acedo ang Misa nga magsugod sa alas sais sa buntag dayon ni Msgr. Abel Apigo sa alas otso nga misa. Sa samang adlaw sab pagahimuon ang kada tuig nga “Pagbuak sa Alkansya sa Bokasyon.” Human niana sugdan ang mga parlor games, dance contest, singing contest, yells by zone, og creative attire sa matag zone.

Busa giawhag ang tanan mga muduyog sa ilang pagmaya ug pagpasalamat uban ang kura paroko nga si Rev. Fr. Rommel P. Banilad, DCD inubanan sa Parish Coordinating Council, staff ug mga parokyano. Viva Sr. Santiago Apostol! (Arielle Rianne Arañez)