Walay layo sa andam mangalagad

Medardo Bantawig, 46 anyos
San Isidro GKK, Zone 4 District 5
Most Sacred Heart Parish, Calinan
Sitio Pangyan, Brgy. Tamugan, Marilog District

Mag-uuma ug amahan sa 7 ka anak, walay kapit-os o baha ang mupugong kang Tatay Medardo aron makatabok 32 ka beses sa Siao River sa Marilog aron lamang makaabot sa parokya ug makatambong sa binulang tigum sama na lamang niining PSK, Secretary ug Treasurer’s meeting.

Pangulo sa 38 ka banay sa iyang GKK, buot ni Medardo nga dad-on silang tanan diha sa Ginoo pinaagi sa Kasaulogan sa Dominggo (KSD). Ang iyang mga anak gianad nang mumata ug sayo kada Dominggo aron muadto sa kapilya.

Matud niya nga gusto niya silang tudluan sa maayong buhat hilabi na sa pag-ampo sa Ginoo. Naglaum siya nga bisan sa hinay-hinay ang mga lagyo nga mga silingan, muduol sab unta sa simbahan. Ug tuod man, pinaagi sa katekismo bag-o magsugod ang KSD, miabot ug kapin 100 ang nagaapil niini. Kini bunga sa pag-ampo, pagpaningkamut ug paghatag sa kaugalingon. Adunay mga higayon nga sa kakusog sa ulan, di na siya kabalik sa ilang balay, busa mangita na lang siya ug katulgan. Bitbit kanunay ang sanina ug baon, si Tatay Medardo naanad na sa upat ka oras nga baktas. Alas 4 pa lang sa kaadlawon, nagsugod na kini ug lakaw aron makaabot sa alas 9:00 nga misa, dayon ang meeting. Human sa pag ilis, mupahulay lang siya kadyot pinaagi sa pagpaminaw sa mga katikaran. Human sa paniudto, mubalik na usab kini. Nanghinaut siya nga sa tabang sa iyang asawa nga GKK secretary, iyang madala ang iyang tibuok banay ug katilingban sa pagtoo.

Nonito Capunong, 60
San Miguel Arkanghel GKK
Most Sacred Heart of Jesus Parish, Calianan
Barangay Tamugan

Bana sa Pangulo sa Pagpanudlo, ug amahan sa Youth Coordinator, 20 ka tuig siyang nangalagad isip Pangulo sa Lituhiya, dayon upat ka tuig isip Pangulo sa Katilingban. Nahagit siya sa asawang katekista, maong maskin lagyo ang mga GKKs/sona ug mabalaka sa Php 60.00 nga pamelete paingon sa parokya sa Calinan, ang kabusy sa panrabaho sa uma, dili babag aron siya magpadayon.

Si Tatay Nonito Capunong, 60 nga taga San Miguel Arkanghel GKK sa Brgy. Tamugan nanghinaut nga maayo pirmi ang panahon aron siya makapugas. Ang pagbalik sa tag-ulan nakapalipay kaniya apan sama ni Medardo ug sa uban pang mga lideres sa Tamugan, ang pagbahis bahis 13 ka beses sa sapa usa ka hagit nila. Aktibo sa Saloy, Lamanan kaniadto pa, ang paglahutay sa pagngalagad ang iyang ginaampo sa kanunay. Nagpasalamat siya sa tabang pinansyal nga ginahatag sa iyang GKK aron makatambong sa meeting.

* * * * * *
Saludo mi sa inyong duha Tatay Medardo ug Tatay Nonito. Hinaut nga daghan ang mabulahan sa pagbasa niining inyong sugilanon. ‘Til next kwentuhan higala. Maminaw ta kang DJ Angelize sa DXGN 89.9 FM, Kwento ng Ordinaryong Tao sa radyo, Lunes-Biyernes, 1-3 PM.