Panaghiusa sulod sa payag: FLA searches for Model Catholic Family

Kahinumdumang gideklara sa Catholic Bishop’s Conference of the Philippines (CBCP) ang tuig 2016 isip “Tuig sa Eyukaristiya ug Pamilya.” Ang tema nahisubay sa siyam ka tuig nga pagpangandam alang sa Jubilee 2021 diin saulogon ang ika-500 nga anibersaryo sa unang Misa sa Limasawa, kung diin nagpabautismo si Rajah Humabon ug ang iyang asawa. Sukad 2013, ang matag tuig gigahin alang sa 9 ka prayoridad-pastoral sa Simbahan sa Pilipinas alang sa bag-ong ebanghelisasyon.

Si CBCP President Socrates Villegas nagkanayon nga ang tuig 2016 ipahinungod unta sa pagluhod aron sa kabag-uhan sa pamilya; nga ang matag pamilyang Katoliko mamahimong misyonaryo sa Eyukaristiya.

SEARCH FOR MODEL CATHOLIC FAMILY

Duyog ang tanang vicariate coordinators sa Family and Life Apostolate (FLA) nahitabo ang piniliay sa “Model Catholic Family” sa Arkidayosis sa Dabaw human sa panel interview niadtong Sabado, Hulyo 2 sa Holy Family Parish, Baliok, Toril, niining dakbayan.

Emosyonal nga miatubang sa panelists, ang pamilya Pastera ang kinaunhang nominee sa trese (13) kabuok nga pamilyang nisalmot. Human sa paghisgut-hisgot sa mga hurado, ang Pamilya Pastera gikan sa The Most Sacred Heart Parish of Calinan ang napili isip sumbanang pamilya nga maoy ipadala sa Manila aron murepresenta sa Dabaw sa kompetisyon karong tuiga.

PAMILYA PASTERA SA PAYAG

Midaku nga namat-an ang pagserbisyo sa simbahan sa iyang Nanay Jelita, katekista ug Tatay Zosimo, Pangulo sa Katilingban sa San Isidro GKK, Talomo, Zone 2, Talomo River, Calinan, si Jiezle Pastera usa na karon ka propesyonal. Siya miyembro sa pamilya Pastera. “Masuko gani ko tong bata pa ko kung magsimba sila o muadto sa kapilya nga dili ko kauban, kung biyaan ko nila sa payag,” pasiuna ni Jiezle.

Isip ikaduhang anak sa lima, malipayon si Jiezle nga gipanganak siya sa “pamilya nga maskin dili arangan anaa gayud alang sa matag-usa, nagkasinabtanay, willing mag-sacrifice, maminaw, ug always supportive.”

Gikan sa ginikanan, aktibo ang mag-igsoong Pastera sa kalihukan sa komunidad: siya ug si Ate Marjorie, 25, aktibong batan-on ug tigbasa sa GKK San Isidro Labrador, si Wennie Loyd, 23 Knights of Columbus, si Aubrey James, 15 Knights of the Altar Server, si Joshua, 10 trainee isip altar boy, si April rose, 13 ug Trisha Jane, 8 Children’s Choir members ug “angels” matag sugat sa Easter Sunday.

“Kung magminyo ko, di nako makalimtan nga ang komunikasyon ug pag-ampo maoy susi sa nagkahiusang pamilya. Dungan jud mi ug kaon, mag istoryahay mi pirmi hilabi na kung muuli si Ate Marjorie sa among payag gikan sa iyang pagtudlo sa Gumitan Elem. School (Marilog), kada Biyernes.

Sa iyang pagdaku, baon ni Jiezle ang mga nindot nga pamatasan nga gitudlo kaniya sulod sa payag. Ug karong siya na ang magulang sa balay, siya na sab ang tigtudlo sa iyang mga igsoon. Sa scholarship nga naangkon gikan sa panabang sa Teresian Association, si Jiezle andam nang muatubang sa kalibutan isip Library Science graduate ug board passer.

Mensahe niya sa tanang mga anak: “magsakripisyo kita alang sa pamilya, kay basin kung manubra kita pagka ambisyosa, magpahilayo lamang kini sa matag usa, adjust lang jud sa kapit-os ug atong bitbiton ang kabug-at uban ang atong nanay ug tatay diha sa pag-ampo sa Ginoo.”