“Kasalan ng Barangay at Parokya” sa mga Lumad ug Bisaya sa Malabog

Nagmalampuson ang “Kasalan ng Barangay at Parokya” sa mga Lumad ug Bisaya sa San Roque Parish Malabog og sa Sitio Malamboon Km.26, Barangay Malabog, niadtong Hunyo 25,2016.

Gikasal ni Fr. Jojo Ortiz, kura paroko, ang 106 ka parisan nga mga Bisaya sa parokya sa buntag, samtang 65 ka parisan nga mga Lumad sa Sitio Malamboon ang gikasal sa San Isidro Labrador GKK ni Datu Berino Mamboo sa hapon. Matud pa ni Fr.Jojo, buot niyang makaluwas ug daghang mga kalag. Ang uban sa gikasal nag advance seminar isip mga bag-ong Pangulo Sa Liturhiya hinungdan nga daghan ang nahimong mga pangulo sa simbahan ug sa mga GKK.

Dungag pa ni Yayac mapasalamaton siya sa Ginoo nga nakasal na gayud bisan gamay ra ang nagasto apan nadawat ang sakramento sa kaminyoon diha sa simbahan.

Tungod sa paningkamot ni Fr.Jojo nga libreng makasal kadtong mga nag-ipon, gihangyo sa parokya ang city government pinaagi sa tabang sa Pastoral Council.

Si Alma Novo usa ka FLA Family Life Apostolate member ug bookkeeper sa Barangay Malabog dako pud ang natabang sa pagproseso sa mga papeles labi na sa mga lumad. “Ulan ug init ang akong nasinati sa kalayo sa Malabog, sa pagbaba sa Dabaw sa pag-process sa mga papeles sama sa Cenomar, birth certificate ug affidavit of cohabitation.”

Nagpadala usab ang grupo ni Brother Jomar Racho og ubang mga parokya labi na sa taga Sasa FLA ug mga regalo sama sa school supplies, used clothings ug bugas alang sa mga lumad sa Sitio Malamboon.

Sa katapusan, matud pa sa barangay kapitan sa Malabog nga si Jessie Areja nga tubag kadto sa nalantaw nga kakulangan sa barangay ug sa simbahan nga daghan ang wala nakasal.

Daku ang matabang sa marriage certificate labi na sa eskwelahan, sa paghatag ug pangalan sa mga anak,ug sa 4Ps nga requirements.

Ang “Kasalan” ikaupat nang nahitabo. Ang unang gihayon 89 ka parisan, ikaduha 66 ka parisan,ikatulo 35 ka partisan, ug kining ikaupat 171 ka partisan.