Food giving nagapadayon sa pista ni San Pedro

Viva Senyor San Pedro! Viva Hesus!

Mao kini ang syagit nga nadungog diha sa pagpangandam sa kapistahan sa atong patron sa Arkidayosis sa Dabaw nga si San Pedro Apostol. Gisugdan ug pilgrimage Mass diin uban sa Misa gisuroy ang imahe si San Pedro sa 32 ka GKKs nga nahisakop sa Parokya sa San Pedro.

Misunod ang Novena Masses sa katedral diin nagkalain-laing mga parokya ang nag sponsor. Nagpasabot lamang nga ang kapistahan ni San Pedro dili lamang alang sa mga miyembro nga nahisakop niini apan sa tibuok Arkidayosis isip inahan sa atong Simbahan sa Dabaw. Hagit sa atong arsobispo nga pinaagi niini, atong mapabati ug mapakita ang pagtinabangay ug pagkahiusa diha sa atong pagtoo.

Nakadugang sa kasadya ang uban pang mga kalihukan sulod sa kapistahan. Adunay blood letting activity, Mansibado Wedding, ug socio-cultural night nga giandam sa mga batan-on sa parokya diin nag inindigay sa ilang mga talento ang mga tulunghaan sa Dabaw.

Nadugangan ang kalipay sa katawhan diha sa adlaw’ng kapistahan. Adunay food giving nga giambitan sa mga lideres sa GKK, SPC employees, ug vendors uban sa atong local nga panggamhanan. Mas misadya pa ug nahimong makahuluganon ang adlaw sa kapistahan diha sa mga misang gipangulohan sa nagkalain-laing Obispo sa Mindanao. Aduna may kahuyang, apan naningkamot sa pagpuyo nga balaan. Sama sa tema nga nagkanayon: “Pagbasul, pagkumpisal, ug pagbag-o kay kita usab sama ni San Pedro gipasaylo sa Ginoo.”

Natapos man ang adlaw sa kapistahan apan nagpabilin ang mga pagtulon-an ug nasinating gugma sa Diyos. Ang kalipay u gang pagkamapasalamaton sa katawhan nagpadayon diha sa pagsyagit, Viva Senyor San Pedro, Viva Hesus! (Dan Baliano | SPC SoCCom)