SAPPMAP ug bloodletting gipakusgan

Duha sa mga programa nga nagalantaw sa kabililhon sa kinabuhi sa mga parokyano sa San Antonio de Padua mao ang SAPPMAP (San Antonio de Padua Parish Mortuary Program) ug Mobile Blood Donation o Bloodletting.

Sa kasamtangan, aduna nay 389 ka miyembro ang SAPPMAP ug 14 ka beneficiarie  ang nakadawat sa espiritwal ug pinansyal nga tabang. Ang tuyo sa maong programa mao ang makigtambayayong sa pamilya sa mipanaw nga miyembro diha sa ilang materyal nga panginahanglan ug sa paghatag og bili sa pag-ampo.

Sa laing bahin, aduna nay 7 ka bloodletting ang napahigayon ang parokya, sukad niadtong 2013, kauban ang Davao Blood Center sa Department of Health ug sa unang higayon niadtong Mayo 1  ang Philippine National Red Cross.

Niadtong milabay nga GKK Night atol sa pagsaulog sa kapistahan ni San Antonio de Padua, ang kapin 100 ka mga blood donors midawat og sertipiko sa pag-ila ug pagpasalamat sa ilang maunongon nga partisipasyon sa programa sa parokya.