Parokyano sa Agdao giawhag nga muduol kanunay kang Kristo

Ang parokya sa San Antonio de Padua nagsaulog sa ika-53 nga tuig isip usa ka panon ni Kristo niadtong Hunyo 12. Ang kinatibuk-ang kasaulogan sa pista nagpadayag sa kabililhon sa santos nga yukaristiya sa kinabuhi diha sa mga pamilya nga naggikan sa 78 ka GKKs nga anaa sa among parokya.

Ang imahe ni San Antonio de Padua milibot sa tanang GKKs diin gihalad ang mga novena masses gikan niadtong Enero 10 hangtod Mayo 26. Human niana, ang mga novena masses dinhi sa among simbahan na gi sponsor sa 9 ka sona nga naglangkob sa among parokya gisaulog niadtong Hunyo 3 hangtod 11.

Misunod dayon ang mga pasundayag ug uban pang makalingaw nga progama nga gihimo sa mga GSLs ug volunteers sa nagkalain laing ministriya ug mga recognized organizations sa among parokya diha sa parish ground ug sa Holy Cross of Agdao gym. Gipangunahan ni Fr. Leonie España ang prosesyon sa imahe ni San Antonio duyog ang mga Pangulo sa Liturhiya, altar servers, pundok sa mga deboto ug mga GKKs.

Gipangunahan ni Arsobispo Valles ang yukaristiya sa alas 8 sa buntag niadtong Hunyo 12. Gipasabot niya nga ang atong kanunay nga pagduol kang Kristo maoy mag ayo sa mga piang sa kaugalingon; nga si Kristo kanunay anaa sa simbahan ug nagahatag sa grasya, paglamdag, pasaylo ug pagbag-o. (Elena Corazon Mozo | SoCCom)