Ang Gawasnong Pagsunod Kang Kristo

June 26, 2016
1 Kgs 19:16b, 19-21/ Gal 5:1, 13-18/ Lk 9:51-62

Matag binunyagan giila nga sumusunod ni Kristo. Mao man bitaw nga gitawag nato ang atong kaugalingon nga mga Kristiyano. Kung dili kita boot mosunod kang Kristo, nan dili nato angayan nga tawgon ang atong kaugalingon nga mga Kristiyano. Ang pangutana, ato bang gipuy-an ang atong pagkasumusunod ni Kristo?

Mao kini ang tema sa atong pamalandong niining ika-napulo’g tulo nga Domingo sa tuig- ang atong gawasnon nga pagsunod kang Kristo.

Diha sa unang pagbasa atong mapamalandungan ang nahitabo sa kinabuhi ni propeta Elisio sa dihang gitawag siya sa Diyos aron mamahimong sumusunod ni Elias. Didto siya sa umahan niadtong tungora, nagdaro sa dihang gisul-ob ni propeta Elias ang iyang kupo ngadto kaniya. Sumala sa mga batid sa Bibliya, gitoohan sa mga Hudio nga ang kupo kabahin sa pagkatao sa bisan kinsa nga nagsul-ob niini, ug anaa diha ang gahum sa tag-iya sa maong kupo. Sa ato pa, ang pagsul-ob ni Elias sa iyang kupo ngadto kang Elisio nagpadayag nga boot niyang si Elisio maoy iyang mahimong sumusunod. Ug nindot kaayo ang nahimong tubag ni Elisio sa maong tawag kay iyang gikuha ug giihaw ang iyag mga baka, unya gisugnod niya ang mga yugo, ug unya nagpakumbira siya. Kini nagsimbolo sa iyang kinabuk-an nga pagtalikod sa tanan aron mosunod sa kabobot-on sa Diyos nga mamahimong sumusunod ni propeta Elias. Ug pinaagi sa iyang pagtalikod sa mga kalibutanong butang, nahimo siyang gawasnon sa pagsunod kang Kristo.

Diha usab sa katapusang bahin sa atong Ebanghelyo, atong madungog ang susamang eksena diin adunay mga tawo nga boot mosunod kang Hesus. Apan ang ilang pagduha-duha tataw kaayo sa dihang nanghangyo una ang usa sa paglubong sa iyang amahan, ug ang usa naghangyo nga kahatagan ug higayon aron sa pagpanamilit sa iyang mga mahal sa kinabui. Kini nagpadayag lamang nga sila dili pa gayud andam sa pagtalikod sa tanan aron pagsunod kang Kristo, sama sa gibuhat ni propeta Elisio. Posibleng aduna silay kaikag sa pagbuhat niini, apan dili pa lamang sila andam. Posible nga adunay daghang mga butang ang nakapahimo kanilang dili gawasnon sa pagsunod kang Kristo.

Kita usab mga igsoon usahay makasinati niini. Diha sa atong kinabuhi adunay daghang mga butang nga makapaulipon kanato ug maghimo kanatong dili gawasnon sa pagsunod kang Kristo. Usahay ang atong kahakog, kasina, ug mga kaligotgot makahimo kanatong mga ulipon.

Si san Pablo nagpahinumdom kanato diha sa atong ikaduhang pagbasa nga pinaagi kang Hesus gawasnon na kita, apan ang atong kagawasan kinahanglan atong gamiton sa pagbuhat sa maayo. Ang atong kagawasan wala nagpasabot nga pwedi natong buhaton ang bisan unsang gusto nato buhaton. Tataw kaayo ang pahimangno ni San Pablo nga dili angay gamiton ang atong kagawasan aron lamang maghari ang lawasnong mga pangandoy.

Mga igsoon pangutan-on nato ang atong kaugalingon, boot ba akong mosunod kang Kristo? Unsa may posibleng makababag kanako sa akong pagsunog kang Kaniya? (Cristopher Alcayde)