Children’s Bible Camp Gipahigayon sa St. Joseph Parish

Ang Parokya ni San Jose nga Mamumuo sa Sasa-Pampanga, Davao City, malipayon nga nagtak-op sa ilahang Children’s Bible Camp 2016 sa tema nga, “Maloluy-ong Kabataan nalig-on diha sa Yukaristiya uban ni Birhen Maria” niadtong ika-31 sa Mayo 2016.

Bago nahitabo ang maong selebrasyon, adunay gipahigayon nga Santos nga Misa sa matag-sona nga gilangkuban sa mga Gagmayng Kristohanong Katilingban kon GKK nga sakop niini. Sumala ni Sis. Cathy Murillo, GKK Catechist Head, “Maayo kining kalihukan kay makita nako ang mga kabataan nga nagkahiusa ug nagkailhanay pinaagi sa Yukaristiya nga naglig-on kanila”.

Sa pagsaulog sa maong kulminasyon, gisugdan kini sa alas-9 sa buntag pinaagi sa Santos nga Yukaristiya nga gipanguluhan ni Rev. Fr. Dionisio Tabiliran, DCD. Nasundan usab kini sa naandan nga “meryenda salo-salo”. Dugang pa niini, adunay hamubo nga programa nga gipahigayon. Isa sa gihatagan ug kabug-aton kay ang mamugnaong paghulagway sa matag-sona sa upat ka misteryo sa Rosaryo pinaagi sa nagkadaiyang Bibliodrama Theatrical Play. Ang Sona 7 ug 8 nga nagpasundayag sa Misteryo sa Kahayag ug Sona 3 ug 4 sa Misteryo sa Kasakit maoy nakadawat sa ikatulo’ng ganti. Ang sona 5 ug 6 nga nagpasundayag sa Misteryo sa Himaya nakadawat sa ikaduhang gantu; ug sona 1 & 2 nga nagpasundayag sa misteryo sa Kalipay nga nakadwat sa unang ganti.

Sa pagtapos niini nabati ang kamaya ug kalipay sa matagkasingkasing diha sa matag-usa. Kay pinaagi usab sa mga pormasyon ug mga misteryo nga gipaambit sa tibuok Mayo, natagamtam ang dakong kaluoy ug gugma sa Dios ug ang mga hiyas ni Birheng Maria nga naghatag ug inspirasyon ug kadasig sa matag-adlaw. (Faith Angela E. Acera)